पोखरा । पोखराका पर्यटन व्यवसायीले पर्यटन नगरी पोखरा घुम्न भारतीयलाई आग्रह गरेका छन् । पर्यटकलाई पोखरा घुम्ने औपचारिक निम्तो दिन उत्तरपूर्वी भारत जाने भएका छन् । नेपालको पर्यटन क्षेत्रमा भारतीय पर्यटक आगमनले भूमिका खेल्ने हुँदा पर्यटन व्यवसायीले भारतलाई लक्ष्य गरेर ‘चलिए पोखरा’ जस्ता प्रवद्र्धनात्मक कार्यक्रम गर्दै आइरहेका छन् ।
पोखरा पर्यटन परिषद्को आयोजना र नेपाल पर्यटन बोर्डको सहयोगमा २१ सदस्यीय टोली यही माघ २२ गते पश्चिम बङ्गाल राज्यको सिलिगुढी जाँदैछ । पाँचदिने सो कार्यक्रममा भारतका महत्वपूर्ण शहर सिलिगुडी र गुवाहाटीमा बिक्री, बजार तथा प्रवद्र्धनात्मक भ्रमण आयोजना गरिएको परिषद्का अध्यक्ष चिरञ्जीवी पोखरेलले आज पत्रकार सम्मेलनमा जानकारी दिनुभयो ।
भारतीय उत्तर पूर्वी ६ राज्यमा पर्यटन ब्यवसाय सञ्चालन गर्ने व्यवसायीको छाता सङ्गठन इस्टर्न हिमालय ट्राभल एण्ड अपरेटर एशोसियशन र पर्यटन परिषद्ले संयुक्त रुपमा आआफ्नो क्षेत्रको पर्यटन प्रवद्र्धन गर्न उद्देश्यले संस्थागत सम्झौता गरेर सहकार्य गर्र्दै आएको अध्यक्ष पोखरेलले जानकारी दिनुभयो । सन् २०१६ देखि शुरु भएको सो कार्यक्रम वार्षिक रुपमा सञ्चालन गरिएको छ । बङ्गाल ट्राभल मार्टमा सहभागी भई आसामसम्म पर्यटन प्रवद्र्धन गर्न जाने कार्यक्रम रहेको बताइएको छ ।
भारतीय सीमा शहर सिलिगुढी र गुवाहटीमा नेपालको पर्यटन बजार रहेको र भौगोलिक, ऐतिहासिक र परम्परागत सम्बन्धमा कारणले नेपाल भ्रमणमा आउने भारतीय पर्यटकको सङ्ख्या विगतका तुलनामा बढ्दै गएको जनाइएको छ । नेपाली भाषीबीबीच नेपाल ठूलो आकर्षण रहेको विगतका अनुभवले पुष्टि गरेको र आगामी दिनमा तिनको आगमन अझ बढ्ने कार्यक्रम संयोजक सञ्जयकान्त सिग्देलले जिकिर गर्नुभयो ।
