काठमाडौं । चैत २९ गतेबाट प्रदर्शनमा आउन लागेको झरना थापा निर्देशित फिल्म ए मेरो हजुर ३ को अफिसियल ट्रेलर सार्वजनिक भएको छ । ट्रेलरमा प्रेमदेखि कमेडीसम्म देख्न सकिन्छ । दोहोरो अर्थ जनाउने संवादमार्फत् हँसाउने सोचबाट भने यो फिल्म पनि ग्रसित देखिन्छ । अभिनेता अनमोल केसीलाई भने डबल रोलमा देख्न सकिन्छ ।
उनी सुपरस्टार गायक प्रेम र एक साधारण युवक धनश्याम महर्जनको चरित्रमा प्रस्तुत छन् । ट्रेलर हेर्दा उनी फिल्ममा डबल रोलमा रहेको अनुमान लगाउन गाह्रो पर्दैन । अनमोलको डेब्यू गर्ल सुहाना थापासँग लभ केमेस्ट्री पनि देख्न सकिन्छ ।
जिन्दगी नै भन्दिनँ र परान बोलको गीतका कारण चर्चामा रहेको यस फिल्मलाई सुनिल कुमार थापाले निर्माण गरेका हुन् । निर्देशक थापा र सुमन पौडेलको कथा रहेको फिल्ममा सञ्जय लामाको छायांकन र हिमाल केसीको द्वन्द्व निर्देशन छ । कविराज गहतराज, रामजी लामिछाने, प्रविन सिंह र राहुल शाहको कोरियोग्राफी रहेको फिल्ममा दिर्घ खड्काले सम्पादन गरेका छन् ।
सैलेश श्रेष्ठको ब्याकग्राउन्ड स्कोर रहेको फिल्ममा सत्यम राना र अचुत बजगाइँले भिएफएक्स गरेका छन् । निर्देशक झरनाले फिल्मले एक स्टार र फ्यानको प्रेम वाचन गर्ने बताइन् । उनले भनिन्, श्रीकृष्ण श्रेष्ठ र झरना थापाको ए मेरो हजुर थियो । यसपछि साम्राज्ञी आरएल शाह र सलिनमान बनियाको ए मेरो हजुर थियो । अब अनमोल र सुहानाको ए मेरो हजुर छ ।
ट्रेलर हेर्नुहोस्
