काठमाडौं । चलचित्र ए मेरो हजुर ३ को अपार सफलतापछि अभिनेत्री निर्देशक झरना थापाले अर्को चलचित्र निर्माण गर्ने भएकि छिन् । चलचित्रको नाम हो भागवत गीता। फिल्मका लागि मुख्य कलाकार पनि फाइनल भएका छन् । झरनाको तेस्रो निर्देशनमा बन्ने यस फिल्ममा ए मेरो हजुर ३ को सुपरहिट जोडी अनमोल केसी र सुहाना थापा दोहोरिने तय भएको छ । झरनाले यसको जानकारी आफ्नो आधिकारिक फेसबुकमार्फत दिएकी छन् ।
उनले आफ्नो आधिकारिक फेसबुक पेजमा अनमोल र सुहानासँगको एक तस्बिर साझेदार गर्दै अंग्रेजीमा लेखेकी छन्, विथ माई भागवत गीता ।ए मेरो हजुर ३ रिलिज लगत्तै अनमोलले यो फिल्मको स्क्रिप्ट पढेका थिए । उनीसँग केही दिन अगाडि निर्माण टिमको कागजी सम्झौता भएको जानकारी प्राप्त छ ।
फिल्मलाई सुनिल कुमार थापाले निर्माण गर्नेछन् । केही दिनमा अभिनेत्री सुहानाको जन्मदिनमा फिल्मको औपचारिक निर्माण घोषणा गर्ने तयारीमा निर्माता थापा छन् ।
