खोटाङ, २० वैशाख ः खोटाङमा स्वास्थ्य बीमाको कार्यक्रम प्रति नागरिकको आकर्षण बढेको पाइएको छ । उपचार खर्च अभावमा अकालमा ज्यान गुमाउन बाध्य नागरिकको जीवन रक्षार्थ नेपाल सरकारले लागू गरेको स्वास्थ्य बीमा कार्यक्रम बापतको सेवासुविधा प्राप्तिका लागि जिल्लाका दश वटै स्थानीय तहमा स्वास्थ्य बीमा दर्ता कार्यक्रमलाई तीव्रगतिमा अघि बढाइएको हो ।
जिल्लाको ऐंसेलुखर्क प्राथमिक स्वास्थ्य केन्द्र, चिसापानी प्राथमिक स्वास्थ्य केन्द्र, जिल्ला अस्पताल खोटाङ, जिल्ला अस्पताल उदयपुर, जिल्ला अस्पताल ओखलढुङ्गा, जिल्ला अस्पताल सोलुखुम्बु, धरान, बिराटनगर, काठमाडौं, भक्तपुरलगायत ठाउँमा रहेका सरकारी अस्पतालबाट बिमाको सर्तअनुसार स्वास्थ्य उपचार सेवा लिन पाउनेगरी स्वास्थ्य बीमा दर्ता भइरहेको स्वास्थ्य बीमा बोर्ड खोटाङका संयोजक सन्तोष दाहालले दिनुभयो । “हरेक वडामा नियुक्त स्वास्थ्य बीमा दर्ता सहयोगीले नाम दर्ता र परिचयपत्र वितरण गरिरहेका छन् ”, उहाँले भन्नुभयो, “२०७४ साल पुस २४ गतेदेखि अहिलेसम्ममा १७ हजार ४५१ जनाले बीमा गरिसकेका छन् ।”
सामाजिक स्वास्थ्य सुरक्षा विकास समिति टेकु, काठमाडौँ अन्तर्गत कातिकदेखि पुससम्म नाम दर्ता भएका नागरिकको स्वास्थ्य बीमा फागुन १ बाट, माघदेखि चैतसम्म नाम दर्ता गरेका नागरिकको बीमा जेठ १ बाट, वैशाखदेखि असारसम्म नाम दर्ता गरेका नागरिकको भदौ १ बाट र साउनदेखि असोजसम्म नाम दर्ता गरेका नागरिकको बीमा मङ्सिर १ गतेबाट लागू हुने जनाइएको छ । १७ हजार बढीले स्वास्थ्य बीमाका लागि नाम दर्ता गरेर परिचयपत्र लिइसकेका जिल्लामा बीमा लागू हुने महिनाको अघिल्लो महिना बीमा गराउनेको चाप बढी हुने गरेको जनाइएको छ ।
पाँच जनासम्मको परिवारले वार्षिक दुई हजार ५०० को स्वास्थ्य बीमा गरेपछि बिरामी परेका समयमा वार्षिक ५० हजारसम्मको स्वास्थ्य उपचार सेवा पाउने भएपछि स्थानीय यो कार्यक्रमप्रति हौसिएका छन् । पाँच जनाभन्दा बढी सदस्य भएको परिवारले स्वास्थ्य बीमा गर्न थप प्रतिव्यक्ति ४५० का दरले शुल्क बुझाउनुपर्छ भने उपचार खर्च पनि ५० हजारमा प्रतिव्यक्ति थप दश हजारका दरले बढी सेवा पाउनेछन् ।
