हलेसी खबर
खोटाङ, २१ मंसिर । खोटाङमा आयोजित तेश्रो जिल्ला स्तरिय अन्तर विद्यालय छात्र फुटबल प्रतियोगीताको उपाधि दिक्तेल इंलिस बोर्डिङ स्कुलले चुमेको छ । शनिबार माटिकोरे खेलमैदानमा भएको फाईनल खेलमा सरस्वती नमूना माबि दिक्तेललाई १ का विरुद्ध ४ गोल गर्दै दिक्तेल इंलिस बोर्डिङ स्कुलले उपाधि उचालेको हो ।
प्रतियोगीतामा दिक्तेल इंलिस बोर्डिङ स्कुलका रविन राई एक्लैले ३ गोल गरे । यस्तै, निसान खत्रीले दिक्तेल इंलिस बोर्डिङ स्कुलका लागि १ गोल थप गरेका छन् । सरस्वती नमूना माबिकातर्फबाट शान्तीराम राईले १ गोल फर्काउन सफल भएका थिए । प्रतियोगीताका आयोजक खोटाङ फुटबल एकेडेमी (केएफए)का खेल संयोजक श्याम पौडेलका अनुसार गत बुधबारदेखि सुरु प्रतियोगीताका विजेता र उपविजेतालाई क्रमशः २५ हजार र १० हजारका साथमा ट्रफी, मेडल र प्रमाण–पत्र प्रदान गरिएको छ ।
प्रतियागीतामा सर्वोत्कृष्ट खेलाडी र सर्वाधिक गोलकर्ताको उपाधि दिक्तेल इंलिस बोर्डिङ स्कुलका रविन राई, उत्कृष्ट गोल रक्षकको उपाधि निशान बिक, बेष्ट डिफेन्डरको उपाधि लक्ष्मण राई, नवोदित खेलाडीको उपाधि निसान खत्री र बेष्ट मिडफिल्डरको उपाधि सरस्वती नमूना माबिका नविन दाहाललाई प्रदान गरिएको छ । विजयी टिम तथा खेलाडीलाई जिल्ला फुटबल संघका अध्यक्ष ध्रुवबिक्रम राई, सरस्वती नमूना माबिका प्रअ ध्यानबहादुर राई, व्यवस्थापन समिति अध्यक्ष जयप्रसाद आचार्य, नेपाल पत्रकार महासंघका अध्यक्ष दमन राई लगायतले पुरस्कार, ट्रफी, मेडल र प्रमाणपत्र प्रदान गरेका छन् । प्रतियोगीतामा जिल्लाका १६ माविले प्रतिष्पर्धा गरेको खोटाङ फुटबल एकेडेमी (केएफए)का अध्यक्ष नूरकाजी शैंजूले बताए ।
प्रतियोगीताका उत्कृष्ट ५ जना खेलाडीलाई प्रिमियर कलेज, ४ जनालाई ग्रामर कलेजले, २ जनालाई व्रिजवाटर इन्टरनेशनल कलेज काठ्माण्डौंले कक्षा ११ र १२ अध्ययनका लागि निःशुल्क छात्रबृत्ति प्रदान गर्ने आयोजकले जनाएको छ । यस्तै, दिक्तेल इंलिस बोर्डिङ स्कुलले १ जना, माउण्ट एभेरेष्ट बोर्डिङ स्कुलले २ जना र सरस्वती नमुना माबि दिक्तेलले पनि ५ जना खेलाडीलाई कक्षा ११ र १२ अध्ययनका लागि छात्रबृत्ति प्रदान गर्ने प्रतियोगीताका आयोजक खोटाङ फुटबल एकेडेमीले जनाएको छ । छात्रवृत्ति प्राप्त गर्नका लागि खेलाडीले एसइईमा कम्तीमा ‘बी प्लस’ ग्रेड ल्याउनुपर्ने जनाइएको छ ।
यस बाहेक उत्कृष्ट ११ खेलाडीले अखिल नेपाल फुटबल संघ (एन्फा)को उमेर समुह राष्ट्रिय खेलाडी छनौट प्रतियोगीतामा सहभागीताको अवशर पाउने खोटाङ फुटबल एकेडेमीका प्रशिक्षक रोशेष श्रेष्ठले बताए ।
