खोटाङ, २१ असार । जिल्लाका होटल व्यवसायीले कोरोना भाइरसको सङ्क्रमण नियन्त्रण गर्न सरकारले लागू गरेको बन्दाबन्दी अवधिभरको विभिन्न किसिमको कर छुटको व्यवस्था गर्न माग गरेका छन् । गत चैत ११ गतेदेखि जारी बन्दाबन्दीका कारण जिल्लाका होटल व्यवसायी, होटल व्यवसायका क्षेत्रमा संलग्न कर्मचारी र मजदुरलाई आर्थिक सङ्कट भएको भन्दै होटल व्यवसायी सङ्घले आइतबार जिल्ला प्रशासन कार्यालयमा ज्ञापन–पत्र बुझाउँदै राहत प्याकेजको व्यवस्था गर्न माग गरेको हो ।
होटल व्यवसायीले राज्य तथा स्थानीय सरकारबाट कार्ययोजना बनाएर बन्दाबन्दीको समय अवधिभरको विजुलीको बिल, खानेपानीको बिल, स्थानीय सरकार तथा राज्य सरकारलाई तिर्नुपर्ने विभिन्न किसिमका कर तथा नवीकरण शुल्क छुट गराउन माग गरेको छ । घर भाडामा लिएर व्यवसाय सञ्चालन गरिरहेका व्यवसायीलाई ५० प्रतिशत घरभाडा र घर बहाल कर छुटको व्यवस्था गर्न, होटल व्यवसायी, कर्मचारी र मजदुरलाई संघीय सरकार, प्रदेश सरकार र स्थानीय सरकारबाट सामाजिक सुरक्षाकोष वा अन्य श्रोतबाट आर्थिक प्याकेजको व्यवस्था मिलाउन माग गरिएको होटल व्यवसायी सङ्घ खोटाङका अध्यक्ष जयप्रसाद राई ‘जेपी’ले बताउनुभयो ।
यस्तै, बैङ्क तथा वित्तीय संस्थाबाट कर्जा लिएर लगानी गरेका होटल व्यवसायी बन्दाबन्दीका कारण ब्याज तथा मासिक कर्जा तिर्न नसक्ने अवस्थामा पुगेका कारण ५० प्रतिशत ब्याज छुट गराई कम्तिमा एक वर्षसम्म ब्याज तथा मासिक किस्ता तिर्न नपर्ने व्यवस्था मिलाउन, पुनः व्यवसाय सञ्चालनका लागि तीन वटै तहका सरकारबाट सहुलियत ब्याज दरमा बैङ्किङ कर्जाको व्यवस्था मिलाउन लगायतका लगायतका सात बुँदे माग गरिएको छ । होटल व्यवसायीले राखेको मागका विषयमा सम्बन्धित निकायसँग छलफल गराउने प्रमुख जिल्ला अधिकारी शालिग्राम शर्मा पौडेलले बताउनुभयो ।
जिल्लाको प्रमुख व्यापारिक केन्द्र दिक्तेल बजार तथा त्रिधार्मिकस्थल हलेसीका अधिकांश होटल भाडाको घरमा सञ्चालित छन् । मासिक रुपमा घरधनीलाई भाडा बुझाएर होटल व्यवसाय सञ्चालन गर्दै आएका व्यवसायी चार महिनादेखि जारी बन्दाबन्दी नहटेपछि चिन्तित बनेका छन् ।
लामो समयको बन्दाबन्दीका कारण जिल्लाका अधिकांश होटल व्यवसायी होटलमा तालाचाँबी लगाएर आ–आफ्नो घर गएका छन् । दैनिक उपभोग्यवस्तु बिक्री÷वितरण गरिने पसलबाहेक जिल्लाका सबै व्यवसाय पूर्णरुपमा बन्दगरिएको छ ।
