खोटाङ, २८ असार । साकेला गाउँपालिका–२ रतन्छाका चार युवाले सामूहिक रुपमा ड्रागन फ्रुटको व्यवसायिक खेती शुरु गरेका छन् । स्थानीय पर्वत राई, सन्तराज राई, निशन राई र चन्द्रकला राईले पारुहाङ ड्रागन फर्म आधिकारिक रुपमा दर्ता गरेर व्यवसायिक ड्रागन फ्रुटको खेती शुरु गरेका हुन् ।
पहिलो चरणमा झापाबाट तीन हजार बिरुवा ल्याएर आठ रोपनी जग्गामा ड्रागन फ्रुटको व्यवसायिक खेती शुरु गरिएको सञ्चालक पर्वतले बताउनुभयो । “ड्रागन फ्रुटको फर्मसँगै नर्सरी समेत उत्पादन शुरु गरिएको छ”, उहाँले भन्नुभयो, “फर्ममा उत्पादित ड्रागन फ्रुटको नर्सरी सहुलियत मुल्यमा बिक्री गरिनेछ ।”
झापाबाट खरिद गरेर ल्याइएका बिरुवामध्ये आधा संख्याको बिरुवा रोपेर अन्य बिरुवा नर्सरीमा राखिएको जनाइएको छ । फर्म सञ्चालकले ड्रागन फ्रुटको बिरुवालाई उभ्याउन रड, सिमेन्ट र बालुवाको पिलर ठड्याएका छन् ।
पिलर नजिकै रोपिएको ड्रागन फ्रुटको बिरुवा बढेर पिलर जतिकै अग्लो भएपछि पिलरमाथि बङ्ग्याइएको रडमा मोटरसाईकलको टायर राखेर ड्रागनको बोट झुण्डिने ठाउँ बनाइने छ । ड्रागन फ्रुटको सम्भावनालाई अध्ययन गरेर दश वर्षका लागि जग्गा भाडामा लिएर खेती व्यवसायिक खेती शुरु गरिएको अर्का सञ्चालक सन्तराजले बताउनुभयो ।
गाउँपालिकाले आर्थिक वर्ष २०७६÷०७७ मा उपलब्ध गराएको रु आठ लाख अनुदान र चारजनाले प्रति व्यक्ति शेयर रु एक÷एक लाख गरी रु १२ लाखमा ड्रागन फ्रुटको खेती शुरु गरिएको जनाइएको छ । जिल्लाकै हलेसी तुवाचुङ नगरपालिकाले ड्रागन फ्रुटको खेतीलाई मध्यनजर गर्दै किसानलाई तालिम दिएको केही समयपछि रतन्छाका चार युवाले ड्रागन फ्रुटको खेतीमा लगानी गरेका हुन् ।
आगामी वर्ष थप १५ रोपनी जग्गामा ड्रागन फ्रुटको खेती विस्तार गर्ने तयारी गरिएको उनीहरुको भनाइ छ । चार युवाले यूट्युव हेरेर समुद्री सतहबाट करिब एक हजार १०० मिटर उचाईमा रहेको जग्गामा ड्रागन फ्रुटको खेती लगाएका हुन् ।
पालिकास्तरीय नमूना कृषि फर्म स्थापना तथा सिँचाइ केन्द्र शिर्षकमा विनियोजन गरिएको रकमबाट रतन्छामा ड्रागन फ्रुटको खेती शुरु गरिएको गाउँपालिकाका कृषि शाखा प्रमुख गणेश राईले बताउनुभयो । चार युवाले शुरु गरेको सामूहिक ड्रागन फ्रुटको खेती शुरुवाती चरणमै राम्रो देखिएको कृषि शाखा प्रमुख राईको भनाइ छ ।
हरेक वडामा कृषक समूह गठन गरेर ‘एक वडा, एक कृषि व्यवसाय’को स्रोत केन्द्र बनाउनेगरि गाउँपालिकामा अभियान नै थालिएको गाउँपालिका प्रमुख अर्जुनकुमार खड्का ‘झङ्कार’ले बताउनुभयो । “वडास्तरमा २९ वटा कृषक समूह गठन गरिएको छ ”, उहाँले भन्नुभयो, “हरेक कृषक समूहलाई आवश्यक सीप तथा तालिमका साथै बीउ÷बीजन, उन्नत जातको पशु तथा पञ्छी, औजार, विषादी र आर्थिक तथा प्राविधिक सहयोग गाउँपालिकाले उपलब्ध गराएको छ ।”
गाउँपालिकाले गत वर्षमा रु ५३ लाख र स्वीस सरकार अन्तरगत हेल्भेटासले रु ४५ लाख २८ हजार गरी जम्मा रु ९८ लाख २८ हजार बजेट विनियोजन गरेको थियो । सबै वडालाई एक÷एक वटा कृषि व्यवसायको स्रोत केन्द्र बनाउने उद्देश्यसहित हरेक वर्ष क्रमशः कृषिमा बजेट बढाउँदै लगिने गाउँपालिका प्रमुख खड्काले बताउनुभएको छ ।
परम्परागत कृषि पेशा अपनाउँदै आएका कृषकहरु गाउँपालिकाले कृषि क्षेत्रमा लगानी बढाएपछि कृषि पेशाप्रति आकर्षित बनेका छन् । गाउँपालिको समग्र कृषि क्षेत्रको विकासका लागि गाउँपालिका प्रमुख र वडाको लागि वडाध्यक्षको संयोजकत्वमा कृषि विकास समिति गठन गरिएको छ ।
