जडान गरेको वर्ष दिन नपुग्दै बल्न छाड्यो नगरपालिकाको सडक सौर्यबत्ती

खोटाङ, ११ असोज । दिक्तेल रुपाकोट मझुवागढी नगरपालिकाले जडान गरेको सडक सोलार बत्ती वर्ष दिन नुपग्दै बल्न छाडेको पाइएको छ । उज्यालो नगर बनाउने नगरपालिकाको अभियान अन्तरगत १५० ठाउँमा जडान गरिएको सडक सोलार बत्तीमध्ये अधिकांश ठाउँमा वर्ष दिन नपुग्दै बल्न छाडेको पाइएको हो ।

नगरपालिकाको आर्थिक वर्ष २०७५÷०७६ विनियोजित रु एक करोड १४ लाख ७८ हजार बजेटमा बिराट इर्नजी प्रा.लि.ले जिल्लाको प्रमुख व्यापारिक केन्द्र दिक्तेल बजार तथा १५ वटै वडामा सोलार बत्ती जडान गरेको थियो । नगरपालिकाको केन्द्रसमेत रहेको दिक्तेल बजार तथा वडाको मुख्य–मुख्य स्थानमा जडान गरिएको सोलार बत्तीमा शुरुदेखि नै समस्या देखिएको स्थानीय बासिन्दाले बताएका छन् ।

अहिले दिक्तेल बजारको रत्नपार्क, सामुदायिक प्रहरी सेवा केन्द्र, माटिकोरे कर्भडहल, आचार्यगाउँ, अस्पतालचोक लगायत विभिन्न ठाउँमा जडान गरिएको सोलार बत्ती बलेको देखिन्दैन । बिराट इर्नजी प्रा.लि.ले आर्थिक वर्ष २०७५÷०७६ को असार मसान्तभित्र जडान सम्पन्न गरेको सोलार बत्ती शुरुदेखि नै कतै नबल्ने तथा कतै बलेको पनि मधुरो बल्ने गरेको स्थानीय बासिन्दाको गुनासो आएको थियो ।

नगरपालिकामा जडान गरिएको सडक सोलार बत्तीमा पाँच वर्षे ग्यारेण्टी भएकाले बीचमा समस्या आउन सक्ने सम्भावनालाई ध्यानमा राखेर ठेकेदार कम्पनीले पाउने धरौटी रकम फिर्ता नदिइ नगरपालिकामै राखिएको नगरपालिकाका सूचना अधिकारी मोहन भट्टराईले बताउनुभयो । सोलार बत्तीमा समस्या आएको भनेर स्थानीय बासिन्दाबाट गत असारदेखि मात्र गुनासो आउन थालेको नगरपालिकाले जनाएको छ ।

आफूहरुले जडान गरेको सडक सोलार बत्तीमा देखिएको समस्या प्राविधिक कुरा भएकाले दशैँ अगाडिसम्ममा उक्त समस्या हल गरेर सञ्चालनमा ल्याउने तयारी गरिएने प्रा.लि.का प्रतिनिधि सरोज शर्माले बताउनुभयो । “गुणस्तरीयतामा नगरपालिकाको मापदण्ड अनुसारकै सामान प्रयोग गरिएको छ”, उहाँले भन्नुभयो, “अहिले विश्वभर फैलिएको कोरोना भाइरसको सङ्क्रमणका कारण अवरुद्ध सोलार बत्ती मर्मत गर्नमा ढिलाइ भएको छ । दशैँ अगाडि मर्मत गरेर पुनः सञ्चालनमा ल्याइनेछ ।”

यसैबीच, दिक्तेल बजारमा जडान गरिएको सिसी क्यामेराले समेत काम गर्न छाडेको पाइएको छ । सरकारी कामकाज तथा किनमेल गर्न आउने सर्वसाधारणको भीड लाग्ने दिक्तेल बजारमा हुन सक्ने आपराधिक क्रियाकलाप नियन्त्रण गर्ने उद्देश्यले बजार क्षेत्रका १६ स्थानमा सिसी क्यामेरा जडान गरिएको थियो ।

नगरपालिकाबाट विनियोजित रु. दश लाखको लगानीमा दिक्तेल बजारका विभिन्न ठाउँमा जडान गरिएको सिसी क्यामेराले काम गर्न छाडेपछि अहिले सार्वजनिक स्थलमै धुम्रपान तथा मादक पदार्थ सेवन गर्ने, असभ्य व्यवहार गर्ने, होहल्ला गर्दै हिड्ने लगायतका क्रियाकलाप बढ्न थालेको पाइएको छ । नगरपालिकाले जडान गरेको सिसी क्यामेराले स्थानीय बासिन्दाको शान्ति सुरक्षामा समेत सघाउ पुग्ने अपेक्षा गरिएको थियो ।

अवरुद्ध सडक सोलार बत्ती तथा सिसी क्यामेरा पुनः मर्मत गरेर चाँडै सञ्चालनमा ल्याउनेगरी प्रक्रिया अगाडि बढाइएको नगरप्रमुख दीपनारायण रिजालले बताउनुभयो । “नगरपालिकामा जडान गरिएका सडक सोलार बत्तीमा ठेकेदारकम्पनीले गद्दारी गरेको पाइएपछि धरौटी रकम जफत गरिएको छ”, उहाँले भन्नुभयो, “जफत गरिएको धरौटी रकमबाटै प्राविधिक खटाएर अवरुद्ध सडक बत्ती मर्मत गरेर पुनः सञ्चालनमा ल्याउनेगरी प्रक्रिया थालिएको छ ।”

सिसी क्यामेरा भने, दिक्तेल बजारको विभिन्न ठाउँमा सडक ढलानको काम भइरहेकाले अवरुद्ध भएको नगरप्रमुख रिजालले बताउनुभएको छ । दिक्तेल बजार क्षेत्रमा विस्तार गरिएका विद्युत पोलमा सिसी क्यामेरा जडान गरिएकाले सडक ढलान गर्दा विद्युत पोल नै हटाइएपछि सिसी क्यामेरा अवरुद्ध भएको जनाइएको छ ।

दिक्तेल बजारमा अवरुद्ध सिसी क्यामेरासमेत पुनः जडान गरेर सञ्चालनमा ल्याउने तयारी भइरहेको नगरपालिकाले जनाएको छ । सडक बत्ती र सिसी क्यामेर एकैसाथ अवरुद्ध भएपछि पछिल्लो समय दिक्तेल बजार अस्तव्यस्त बनेको छ ।