खोटाङ, २६ असोज । साकेला गाउँपालिका–२ रतन्छाका एक युवकमा कोरोना भाइरसको सङ्क्रमण देखिएपछि उक्त वडालाई एक हप्ताका लागि सिल गरिएको छ । काठमाडौँबाट आएका युवामा कोरोना सङ्क्रमण पुष्टि भएपछि उक्त वडालाई आगामी कातिक ३ गतेसम्मका लागि सिल गरिएको हो ।
घरपरिवार, छिमेकी, टोल, वडा र गाउँपालिकाका स्थानीयलाई सम्भावित सङ्क्रमण हुनबाट बचाउन गरिएको गाउँपालिकाले जारी गरेको सूचनामा उल्लेख छ । स्वदेशका विभिन्न ठाउँबाट आएका तथा विदेशबाट आएका २० जनाको स्वाब सङ्कलन गरेर परीक्षणमा पठाइएकामा एक जनाको रिपोर्ट पोजिटिभ देखिएको गाउँपालिकाका प्रमुख प्रशासकीय अधिकृत रवीन मगरले जारी गर्नुभएको सूचनामा उल्लेख छ ।
पिसिआर परीक्षणका लागि उनीहरुको स्वाब असोज २० गते सङ्कलन गरेर बिराटनगर पठाइएको थियो । वडामा कोरोना भाइरसको सङ्क्रमित भेटिएपछि गाउँपालिकाबाट प्रवाह हुने अतिआवश्यक बाहेकका अन्य सेवासमेत बन्द गरिएको गाउँपालिका प्रमुख अर्जुनकुमार खड्का ‘झङ्कार’ले जानकारी दिनुभयो ।
अवधिमा गाउँपालिकाको केन्द्र मानेभञ्ज्याङ आसपासमा सञ्चालनमा रहेका होटल तथा पसल, बैङ्क तथा बित्तीय संस्था, साना तथा ठूला सवारी साधन बन्द गरिएको गाउँपालिकाले जनाएको छ । साकेला गाउँपालिकामा यसअघि एक जनालाई कोरोना सङ्क्रमण पुष्टि भएको थियो ।
यससँगै दश स्थानीय तह रहेको जिल्लामा हालसम्म कोरोना भाइरसबाट सङ्क्रमित हुने व्यक्तिको संख्या ३१ पुगेको छ । सङक्रमितमध्ये २१ जनाले कोरोना जितेर घर फर्किसकेका छन् भने दश जना उपचारमा रहेका छन् ।
दुई नगरपालिका आठ गाउँपालिका रहेको जिल्लामा हालसम्म दिक्तेल रुपाकोट मझुवागढी नगरपालिकामा सबैभन्दा बढी सङ्क्रमित भेटिएका छन् । उक्त नगरपालिकाबाट पिसिआर परीक्षणमा पठाइएका मध्ये १६ जनालाई सङ्क्रमण पुष्टि भएको जिल्ला अस्पताल खोटाङका मेडिकल अधिकृत डा. शैलेस श्रेष्ठले बताउनुभयो ।
हलेसी तुवाचुङ नगरपालिका र खोटेहाङ गाउँपालिकामा चार÷चार जना, जन्तेढुङ्गा गाउँपालिकाका दुई जना, दिप्रुङ चुइचुम्मा, ऐसेलुखर्क, र बराहपोखरी गाउँपालिकाका एक÷एक जनालाई सङ्क्रमण पुष्टि भएको छ ।
केपिलासगढी गाउँपालिका र रावाबेँसी गाउँपालिकामा हालसम्म सङ्क्रमित फेला परेका छैनन् । केपिलासगढी गाउँपालिकाका ३५ जना र रावाबेँसी गाउँपालिकाका ६५ जनाको पिसिआर परीक्षण गरिसकिएको छ ।
