खोटाङ, २२ चैत । प्रदेश नं. १ का सामाजिक विकासमन्त्री उषाकला राईले जिल्ला आयुर्वेद स्वास्थ्य केन्द्र खोटाङको नवनिर्मित भवन अनुगमन गर्नुभएको छ । सघन शहरी तथा भवन निर्माण आयोजना ओखलढुङ्गाको रु सात करोड ३६ लाख २१ हजारको लागतमा निर्माण सम्पन्न गरिएको तीन तले आरसिसी भवन आज (आइतबार) मन्त्री राईले अनुगमन गर्नुभएको हो ।
अनुगमनमा पुग्नुभएका मन्त्री राईले भवन सञ्चालनका लागि आवश्यक पर्ने उपकरण, खानेपानी लगायत अत्यावश्यकीय सामग्री तत्काल व्यवस्थापन गर्ने मन्त्री राईले बताउनुभएको छ । निर्माण सम्पन्न भवन नयाँ वर्षको अवसर पारेर वैशाख–१ गतेसम्ममा आवश्यक कर्मचारीको व्यवस्थान गरेर सञ्चालन गरिने जिल्ला आयुर्वेद स्वास्थ्य केन्द्र खोटाङका निमित्त अजयकुमार प्रमुख झाले बताउनुभयो ।
भवनको पहिलो तलामा १२ कोठा, दोस्रो तलामा हलसहित पाँच कोठा र तेस्रो तलामा दुई आवास गृहसहित आठ कोठा रहेको र आगलागी हुँन नदिनका लागि प्रत्येक कोठामा फाएर फायरस्टिङ्गरसमेत जडान गरिएको छ । वि.सं. २०५५ सालमा स्थापना भएको जिल्ला आयुर्वेद स्वास्थ्य केन्द्रको खोटाङको कार्यालय अहिलेसम्म दिक्तेल बजारस्थित भाडाको घरमा सञ्चालन हुँदै आएको थियो ।
भवन निर्माणका लागि स्थानीय पदमप्रसाद आचार्य, पर्शु आचार्य र मीना आचार्यले १ रोपनी ५ आना, दृपनारायण आचार्यले ४ आना, टंकप्रसाद आचार्यले १ रोपनी, रामप्रसाद आचार्यले ४ आना, बोलराज आचार्यले २ आना र स्थानीय बासिन्दाले सङ्कलन गरेको चन्दाबाट खरिद गरिएको १ रोपनी १ आना जग्गा खरिद गरिएको थियो । भवन अभावमा कार्यालय सञ्चालनमा समस्या झेल्दै आएको आयुर्वेदका लागि आफ्नै सुविधा सम्पन्न भवन बनेपछि सहज हुने अपेक्षा गरिएको छ ।
ठेकेदार कम्पनीको लापरवाहीका कारण जिल्लाका अधिकांश योजनाका काम तोकिएको मितिमा सम्पन्न नभइ रहेको अवस्थामा प्रतिष्ठा कन्ट्रक्सन प्रा.लि.का प्रतिनिधि भीषण राईले समयअवधि अगाडि नै निर्माण सम्पन्न गरेर हस्तान्तरण गर्नुभएको थियो । दश स्थानीय तह रहेको जिल्लामा अधिकांश भौतिक पूर्वाधार निर्माणका योजनामा ठेकेदार कम्पनीको लापरवाहीका कारण योजनाहरु अलपत्र परेका छन् ।
यसैबीच, कोदोको रक्सीलाई ‘ब्याण्ड भर्सेज ब्राण्ड’को थाल्नुभएका सामाजिक विकासमन्त्री राईलाई वडा कार्यालय बुइपा र खोटाङ उद्योग बाणिज्य सङ्घले खोटाङले रक्सी उपहार दिएका छन् । स्थानीयस्तरमा उत्पादन हुने कोदोको लोकल रक्सीलाई कानूनी रुपमा वैधता दिएर व्यवसायीकरण गराउन कोदोको तीनपाने रक्सी उपहार दिएका हुन् ।
वडाबासी र वाणिज्य सङ्घले प्रदान गरेको तीनपाने रक्सी ग्रहण गर्नुहुँदै मन्त्री राईले कादोको रक्सी उत्पादनलाई व्यवसायिक तथा घरेलु उद्योगको रुपमा विकास गर्न पहल थालेको बताउनुभयो । प्रधानमन्त्री र मुख्यमन्त्रीसमेत सकारात्मक रहनुभएकाले कोदोको रक्सीलाई वैधता दिने अभियानले चाँडै नै पूर्णता पाउने बताउनुभयो ।
मन्त्री राईले साना उद्योगका रुपमा रहेको कोदोको रक्सी उत्पादनलाई कानूनीरुपमा बैधता दिने प्रबन्ध मिलाउनुपर्ने बताउँदै आउनुभएको छ । खोटाङको दिक्तेल बजारमा यसअघि स्थानीय उत्पादनको रक्सी प्रहरीले जफत गरेर नष्ट गरेको विषयलाई लिएर स्थानीय सरकारको कडा आलोचनासमेत गर्नुभएको थियो ।
वि.सं. २०६४ सालमा एमालेको तर्फबाट संविधानसभा सदस्य रहँदा राईले अंश र वंशमा महिलाको समान अधिकार स्थापित गराउन, आमाको नामबाट नगरिकता प्रदान गर्ने मुद्दामा अहम् भूमिका निर्वाह गर्नुभएको थियो । तत्कालीन संविधानसभामा अन्तरपार्टी महिला सांसद समूह (ककस)को संयोजक बन्नुभएकी राई २०७४ को निर्वाचनमा नेकपा एमालेबाट प्रदेश १ को समानुपातिक सांसद हुनुभएको थियो ।
