खोटाङ, १६ वैशाख । खोटेहाङ गाउँपालिकामा सम्पन्न चौथो अध्यक्ष कप अन्तर वडास्तरीय खुला पुरुष भलिबल प्रतियोगिताको उपाधि भोजपुरको षडानन्द नगरपालिका–१ नेपालेडाँडाले उचालेको छ । गाउँपालिकाको चौथो वार्षिक उत्सवको अवसरमा आयोजित प्रतियोगितामा भोजपुरकै आम्चोक गाउँपालिका–३ थिदिङ्खालाई सोझो सेटमा हराउँदै नेपालेडाँडाले उपाधिमाथि कब्जा जमाएको हो ।
जिल्लाको पुरानो सदरमुकाम खोटाङबजारस्थित भगवती दिनानाथ माविको प्राङ्गणमा आयोजित महिलातर्फको प्रतियोगिताको उपाधि ओखलढुङ्गाको मानेभञ्ज्याङ गाउँपालिका–१ मोलीले उचालेको छ । खोटाङको दिप्रुङ चुइचुम्मा गाउँपालिका–५ स–छितापोखरीलाई सोझो सेटमा हराउँदै मानेभञ्ज्याङ गाउँपालिका–१ मोलीले उपाधिमाथि कब्जा जमाएको हो ।
पुरुषतर्फको प्रतियोगितामा चम्पादेवी गाउँपालिका–१ पलापु ओखलढुङ्गा र खोटाङको ऐसेलुखर्क गाउँपालिका–६ ज्यामिरे तथा महिलातर्फ खोटाङको बराहपोखरी गाउँपालिका–२ सुन्तले र रामप्रसादराई गाउँपालिका–८ बासीखोरा भोजपुरले सेमिफाइनलिष्टमा चित्त बुझाएको छ । प्रतियोगितामा खोटाङ, ओखलढुङ्गा, उदयपुर र भोजपुरका गरी पुरुषतर्फ २३ समूह र महिलातर्फ आठ समूहको सहभागिता रहेको खेल संयोजक एवम् खोटेहाङ गाउँपालिका–२ वाप्लुखाका वडाध्यक्ष दीपेन थुलुङले जानकारी दिनुभयो ।
प्रतियोगितामा पहिलो, दोस्रो तथा दुई वटा सेमिफाइनलिष्ट समूहलाई क्रमशः नगद रु एक लाख ११ हजार १११, रु ६६ हजार ६६६ र रु ३३ हजार ३३३ का साथमा ट्रफी, मेडल र प्रमाणपत्र प्रदान गरिएको छ । यस्तै, विद्यागत पुरस्कार अन्तरगत अनुशासित समूहमा पुरुषतर्फ चम्पादेवी गाउँपालिका–१ पलापु ओखलढुङ्गा तथा महिलातर्फ बराहपोखरी गाउँपालिका–२ सुन्तले, उत्कृष्ट खेलाडी पुरुषतर्फ षडानन्द नगरपालिकाका सन्दिप कठेत तथा महिलातर्फ आमचोक गाउँपालिकाका ममता राई, उत्कृष्ट लिफ्टर पुरुषतर्फ आमचोक गाउँपालिकाका निशान राई तथा महिलातर्फ मानेभञ्ज्याङ गाउँपालिकाकी पूर्णिमा बाहिङ राई र उत्कृष्ट स्पाइकर पुरुषतर्फ चम्पादेवी गाउँपालिकाको समिप श्रेष्ठ तथा महिलातर्फ मानेभञ्ज्याङ गाउँपालिकाकी चन्दाकुमारी बस्नेतले हात पारेका छन् ।
चौथो अध्यक्षक कप अन्तर वडास्तरीय महिला तथा पुरुष खुला भलिबल प्रतियोगिताको विद्यागत पुरस्कार अन्तरगत उत्कृष्ट समूह तथा खेलाडीलाई जनही रु पाँच÷पाँच हजारका साथमा ट्रफी, मेडल र प्रमाणपत्र प्रदान गरिएको गाउँपालिकाले जनाएको छ । विजयी समूह तथा खेलाडीलाई समापन कार्यक्रमका प्रमुख अतिथि प्रतिनिधिसभा सदस्य एवम् नेकपा एमाले संसदीय दलका प्रमुख सचेतक विशाल भट्टराईले पुरस्कार प्रदान गर्नुभएको थियो ।
गाउँपालिकाको चौथो वार्षिक उत्सव समापन कार्यक्रममा उष्कृट कृषक, उत्कृष्ट कृषक समूह, उत्कृष्ट पशुपालक समूह, उत्कृष्ट उपभोक्ता समिति, उत्कृष्ट कर्मचारी, उत्कृष्ट शिक्षक लगायतलाई नगद पुरस्कार रु एघार हजार १११ सहित कदरपत्रद्धारा सम्मान गरिएको छ । तीन दिनसम्म मनाइएको वार्षिक उत्सवको अवसरमा विभिन्न जातजातिको साँस्कृतिक झाँकीसमेत प्रस्तुत गरिएको थियो ।
गाउँपालिका प्रमुख प्रदीप राईको अध्यक्षतामा आयोजित समापन कार्यक्रममा उपप्रमुख कविता राई, प्रमुख प्रशासकीय अधिकृत हरिप्रसाद भट्टराई, राजनीतिक दलका प्रमुख तथा प्रतिनिधि, शैक्षिक संस्थाका प्रमुख लगायतको उपस्थिति रहेको थियो । विश्वभर फैलिएको कोरोना भाइरसको सङ्क्रमण भीडभाडका कारण समुदायमा फैलिन सक्ने सम्भावनालाई ध्यानमा राख्दै स्वास्थ्य मापदण्ड अपनाएर कार्यक्रम सञ्चालन गरिएको गाउँपालिकाले जनाएको छ ।
