खोटाङ, २३ साउन । खोटाङ समाज हङकङले खोटाङ जिल्लाका सबै स्थानीय तहलाई रु नौँ लाखभन्दा बढीको स्वास्थ्य सामग्री उपलब्ध गराएको छ । विश्वभर फैलिएको कोभिड–१९ को महामारी रोकथाम तथा नियन्त्रणमा सहयोग पु¥याउन समाजले दुई नगरपालिका र आठ गाउँपालिकालाई शनिबार रु नौँ लाख ५२ हजार ५६ बराबरको स्वास्थ्य सामग्री उपलब्ध गराएको हो ।
खोटाङ प्राकृतिक प्रकोप सहयोग कोषको समन्वयमा खोटाङ समाज हङकङले चार थान अक्सिजन सिलिण्डर, सेनीटाइजर स्प्रे, पिपिई, फेससिल्ड, पल्स अक्सिमिटर, थर्मल गन, गाउन, सर्जिकल ग्लोव्स, ह्याण्ड सेनीटाइजर, स्ट्रेचर, ह्वील चेयर लगायतका स्वास्थ्य सामग्री उपलब्ध गराएको जनाइएको छ । जिल्लाका सबै स्थानीय तहमा पठाउनेगरी खोटाङ समाज हङकङका सदस्य धर्मराज राईले जिल्ला समन्वय समिति खोटाङका प्रमुख एवम् अस्पताल विकास समितिका अध्यक्ष बबि चाम्लिङलाई स्वास्थ्य सामग्री हस्तान्तरण गर्नुभएको छ ।
खोटाङमा जन्मिएर हाल हङकङमा बसिरहेका खोटाङ्गेले स्थापना गरेका समाजको अगुवाइमा हङकङमा सञ्चालन गरिएको सहयोग अभियानका क्रममा जम्मा भएको रकमबाट काठमाडौँमा स्वास्थ्य सामग्री खरिद गरेर जिल्ला ल्याइएको समाजका सदस्य राईले बताउनुभयो । समाजमा आवद्ध खोटाङ्गेले आफ्नो मातृभूमिका लागि उपलब्ध गराएको स्वास्थ्य सामग्री जिल्लाका हरेक स्थानीय तहमा करीब रु ९०÷९० हजार बराबरको पुग्ने अनुमान गरिएको ।
यसअघि खोटाङ सेवा समाज युके (बेलायत)ले जिल्ला अस्पताल खोटाङ र स्थानीय तहलाई दुई चरणमा स्वास्थ्य सामग्री उपलब्ध गराएको थियो । ‘अक्सिजन पठाऔँ, आफन्तको ज्यान बचाऔँ’ भन्ने नाराका साथ समाजले रु चौबीस लाख ६० हजार २०० रकमको स्वास्थ्य सामग्री उपलब्ध गराएको हो ।
पहिलो चरणमा थरमल गन, कन्सनट्रेटर मेसिन, पल्सअक्सी मिटर, इन्ट्यूवेसन सेट, अक्सिजन मास्क, सक्सन ट्यूव, गाइड्लर एरवेज, थ्रीवएज अक्सिजन कारमेला र दोस्रो चरणमा पोर्टेबल एक्सरे मेसिन, प्यासेन मनिटर, स्टाण्ड माउन्टेड, एन्टिजेन टेस्ट कीट लगायतका स्वास्थ्य सामग्री उपलब्ध गराएको समाजका सदस्य जानुका राईले बताउनुभयो ।
समाजका अध्यक्ष डा. प्रमोद कोयी राईले भर्चुअल माध्यमबाट एक कार्यक्रमगरी खोटाङका प्रमुख जिल्ला अधिकारी मित्रलाल शर्मा र जिल्ला स्वास्थ्य कार्यालय खोटाङका प्रमुख पुण्यप्रसाद सिग्देलको रोहबरमा जिल्ला कोभिड अस्पताल र स्थानीय तहलाई स्वास्थ्य स्वास्थ्य सामग्री हस्तान्तरण गर्नुभएको हो ।
दश स्थानीय तह रहेको जिल्लामा हाल कोरोना सङ्क्रमितको सङ्ख्या दिनानुदिन घट्दै गएको जिल्ला कोभिड–१९ सङ्कट व्यवस्थापन केन्द्र (डिसिसिएमसि) खोटाङले जनाएको छ । डिसिसिएमसिका अनुसार गत वैशाख यता दुई हजार ५१४ जनालाई सङ्क्रमण देखिएको जिल्लामा हाल ३६९ जना सक्रिय सङ्क्रमित रहेका छन् ।
पूर्वी पहाडी जिल्ला खोटाङमा अहिलेसम्म निषेधाज्ञा लागू गरिएको छैन । निषेधाज्ञाले जिल्लामा निर्माणाधीन विकास निर्माणका काममा समस्या हुनुका साथै विभिन्न बिकृति फैलन सक्ने भन्दै जिल्ला प्रशासन कार्यालयले निषेधाज्ञा लागू नगरेको हो ।
नेपाल सरकारले ठूला शहर तथा बजारमा ५०० र पहाडी जिल्लामा २०० जना सक्रिय सङ्क्रमित भएको खण्डमा निषेधाज्ञा लागू गर्न निर्देशन दिएको थियो । जिल्लामा निषेधाज्ञा लागू नगरिएपनि सरकारले निर्धाण गरेको स्वास्थ्य मापदण्डलाई पालना गरिएको प्रमुख जिल्ला अधिकारी एवम् डिसिसिएमसिका संयोजक शर्मा बताउनुभयो ।
