काठमाडौं,२९ साउन । कोरोनाबाट असर परेको उद्योग व्यवसायलाई प्रवर्द्धन गर्ने लक्ष्यका साथ नेपाल राष्ट्र बैंकले चालु आर्थिक वर्षको मौद्रिक नीति सार्वजनिक गरेको छ । राष्ट्र बैंकका गभर्नर महाप्रसाद अधिकारीले आज मौद्रिक नीति सार्वजनिक गर्दै कोरोनाको असर न्यून गर्न यसअघि नै ल्याइएको पुनरुत्थान कर्जालाई निरन्तरता दिइएको जानकारी दिनुभयो ।
नीतिमा कोरोनाका कारण सबैभन्दा बढी प्रभावित भएको होटल, पर्यटन तथा हवाई क्षेत्रलाई विशेष चासोका साथ सम्बोधन गरिएको छ । कोरोनाका कारण नगद प्रवाहमा समस्या भएका क्षेत्रलाई समेत मौद्रिक नीतिले विशेष चासो दिएको छ । यस्तै कोरोनाले समस्यामा पारेको सार्वजनिक यातायातको मर्मत-सम्भारका लागि थप दुई लाख रुपैयाँसम्मको ऋण दिने व्यवस्था गरिएको छ । स्थिर विनिमय दरको व्यवस्था, वित्तीय स्रोत परिचालनको दायरा फराकिलो बनाइएको छ भने ब्याजदर करिडोर, ब्याजदर स्थायित्व कामय हुने गरी व्यवस्थापन गरिएको छ ।
यस्तै विप्रेषण बैंक तथा वित्तीय संस्थामा राखेको अवस्थामा थप ब्याज पाउने नयाँ व्यवस्था नीतिमा गरिएको छ । गभर्नर अधिकारीका अनुसार विप्रेषण रकम (रेमिट्यान्स) बैंकिङ प्रणालीमा राखिएको सन्दर्भमा अहिले पाउने ब्याजदरमा थप एक प्रतिशत बढी पाउने व्यवस्था गरिएको छ । नेपाल नीतिमा शेयर धितोमा कर्जाको धितो अनुपात यथावत कायम गरिएको छ । यसमा मार्जिन धितो कर्जा एक व्याक्ति वा संस्थाले अधिकतम् ४ करोड र अधिकतम १२ करोडसम्म लिन पाउनेछन् ।
त्यस्तै कारोनाको कारणले थला परेको पर्यटन क्षेत्रका लागि मौद्रिक नीतिले मल्हम लगाएको छ । पर्यटन क्षेत्रका होटल, हवाई र ट्राभललगायतका क्षेत्रलाई हर्जना नलाग्ने व्यवस्था गरेको छ । यस्तै कोरोनाका कारण अतिप्रभावित क्षेत्रका व्यवसायीले बैंकको ऋण तिर्न नसक्दा हर्जना नलाग्ने भएको छ ।
