खोटाङ, १ माघ । नेकपा (एकीकृत समाजवादी) निकट प्रगतिशील नेपाल राष्ट्रिय शिक्षक सङ्गठन खोटाङका अध्यक्षमा गोविन्द कटवाल चयन हुनुभएको छ । दिक्तेलस्थित पार्टी कार्यालयमा भएको प्रथम जिल्ला अधिवेशनबाट कटवाल अध्यक्ष रहेको २७ सदस्यीय जिल्ला कार्यसमिति सर्वसहमत चयन गरिएको हो ।
समितिको उपाध्यक्षमा कुमार ढकाल र सरस्वती घिमिरे, सचिवमा सरोज विश्वकर्मा, उप–सचिवमा कुमार लुइटेल, कोषाध्यक्षमा जीतबहादुर थापा र सह–कोषाध्यक्षमा सुजन तामाङ चयन हुनुभएको छ । नेकपा (एकीकृत समाजवादी) खोटाङका अध्यक्ष जलसेर राईको प्रमुख आतिथ्यता तथा प्रगतिशील नेपाल राष्ट्रिय शिक्षक सङ्गठनका केन्द्रीय सदस्य पञ्चकुमार राईको विशेष आतिथ्यतामा अधिवेशन गरिएको हो ।
कार्यक्रममा प्रगतिशील नेपाल राष्ट्रिय शिक्षक सङ्गठनका प्रदेश सचिव देवराज ढकाल, नेकपा (एकीकृत समाजवादी)का जिल्ला सचिव राजन आचार्य, उप–सचिवद्धय किशोर आचार्य र माइतीराज राई, कोषाध्यक्ष एण्टी शेर्पा लगायतको उपस्थिति थियो । नेकपा (एमाले)बाट विभाजन भएर बनेको नेकपा (एकीकृत समाजवादी) खोटाङले पार्टी तथा भातृ सङ्गठन निर्माणलाई तीव्रता दिएको छ ।
