खोटाङ, ४ जेठ । दिक्तेल रुपाकोट मझुवागढी नगरपालिकाको प्रमुख र उपप्रमुखमा सत्ता गठबन्धनमा आवद्ध चार राजनीतिक दलका साझा उम्मेदवारी विजयी भएका छन् । नेपाली काँग्रेस, नेकपा (माओवादी केन्द्र), जनता समाजवादी र नेकपा (एकीकृत समाजवादी) पार्टीबीच चुनावी तालमेल भएको यस नगरमा नेपाली काँग्रेसका तीर्थराज भट्टराई प्रमुख र नेकपा (माओवादी केन्द्र)का बिसन राई उपप्रमुखमा विजयी हुनुभएको हो ।
भट्टराईले आफ्ना निकटतम प्रतिस्पर्धी नेकपा (एमाले)का कुमार आचार्यलाई चार हजार ३९३ र बिसनले एमालेकै विणादेवी राईलाई तीन हजार ११९ मतान्तरले पछि पार्दै प्रमुख र उपप्रमुखमा विजयी हुनुभएको मुख्य निर्वाचन अधिकृत मात्रिकाप्रसाद आचार्यले जानकारी दिनुभयो । भट्टराईले एघार हजार ३८९ मत ल्याएर विजयी हुँदा आचार्यले छ हजार ९९६ मत र बिसनले दश हजार ४३८ मत ल्याएर विजयी हुँदा निकटतम् प्रतिस्पर्धी विणादेवीले सात हजार ३१९ मत ल्याउनुभएको छ ।
वैशाख ३० गते सम्पन्न स्थानीय तहको निर्वाचनमा राष्ट्रिय प्रजातन्त्र पार्टी (राप्रपा)का जीवनकुमार श्रेष्ठले नगर प्रमुखमा ४०५ मत, खम्बुवान राष्ट्रिय मोर्चाका सुवाश राईले ४८ मत तथा राप्रपाबाटै उपप्रमुखमा चन्द्रकुमारी राई ‘तारा’ले ५६६ मत ल्याउनुभएको सहायक निर्वाचन अधिकृत प्रतिभा राईले जानकारी दिनुभयो । नगर प्रमुख र उपप्रमुखमा चार राजनीतिक दलबीच चुनावी तालमेल भएको यस नगरपालिकाको अधिकांश वडामा एक्ला–एक्लै प्रतिस्पर्धा भएको थियो ।
नगर प्रमुखमा पराजित हुनुभएका आचार्य एमाले खोटाङका सचिव हुनुहुन्छ भने, उपप्रमुखमा पराजित विणादेवी वि.सं. २०७४ सालको निर्वाचनमा एमालेबाट सोही पदमा निर्वाचित हुनुभएको थियो । पन्ध्र वडा रहेको यस नगरपालिकाको प्रमुखमा अघिल्लो निर्वाचनमा एमालेबाटै दीपनारायण रिजाल विजयी हुनुभएको थियो ।
जिल्लाको सबैभन्दा ठूलो स्थानीय तह तथा सबैको ध्यान केन्द्रित हुने यस नगरपालिकाको तीनवटा वडामा एमालेका उम्मेदवार वडाध्यक्षमा विजयी भएका छन् । वडा नं. ३ बाम्राङमा महेन्द्रकुमार राई, वडा नं. ८ दोर्पा बुवालुङमा लीलाकुमार चौहान र वडा नं. १४ बुइपामा दिनेश राई निर्वाचित हुनुभएको हो ।
वडा नं. १ दिक्तेलमा चार दलीय गठबन्धनबाट काँग्रेसका नवराज राई, वडा नं. २ सोल्मामा माओवादी केन्द्र र नेकपा (एकीकृत समाजवादी)बाट माओवादी केन्द्रका ध्रुबविक्रम राई, वडा नं. ४ खाल्लेमा माओवादी केन्द्रका खगेन्द्र राई, वडा नं. ५ लफ्याङमा काँग्रेसका दिनेश घिमिरे, वडा नं. ६ नेर्पामा माओवादी केन्द्र र नेकपा (एकीकृत समाजवादी)बाट माओवादी केन्द्रका माधव राई, वडा नं. ७ दोर्पा चिउरीडाँडामा काँग्रेसका हरि चौलागाइँ, वडा नं. ९ निर्मलीडाँडामा माओवादी केन्द्रका दिनेश कठायत विजयी हुनुभएको छ । यस्तै, वडा नं. १० पाथेकामा माओवादी केन्द्र र जनता समाजवादीबाट जनता समाजवादीका मुगाधन राई, वडा नं. ११ खार्मीमा माओवादी केन्द्र, जनता समाजवादी र नेकपा (एकीकृत समाजवादी)बाट जनता समाजवादीका इखबहादुर राई, वडा नं. १२ जालपामा माओवादी केन्द्रका दानबहादुर राई, वडा नं. १३ नुनथलामा माओवादी केन्द्र र नेकपा (एकीकृत समाजवादी)बाट माओवादी केन्द्रका भगेश्वर राई र वडा नं. १५ विजयखर्कमा काँग्रेस, माओवादी केन्द्र, जनता समाजवादी र नेकपा (एकीकृत समाजवादी) पार्टीबाट काँग्रेसका रामबहादुर कटवाल वडाध्यक्षमा विजयी हुनुभएको हो ।
दश स्थानीय तह रहेको जिल्लामा हालसम्म दिक्तेल रुपाकोट मझुवागढी नगरपालिकासहित नौँवटाको मत परिणाम आइसकेको छ भने, एउटाको मत गणना जारी छ । मत परिणाम आउन बाँकी हलेसी तुवाचुङ नगरपालिकाको प्रमुख र उपप्रमुख दुवैमा नेपाली काँग्रेसका उम्मेदवारको अग्रता रहेको जनाइएको छ ।
