काठमाडौँ । एमाले नेता महेश बस्नेतले काठमाडौंका मेयर बालेन साहालाई आफ्नो घरको नक्सा हेर्न सूर्यविनायक नगरपालिकामा काजमा आउन चेतावनी दिएका छन् । बुद्धनगरस्थित अल्फाबिटामा महानगरको डोजर चलेपछि कडा प्रतिक्रिया जनाएका महेश बस्नेतलाई मेयर बालेन शाहले तपाईंको घरको नक्सा पास छ नि ? भन्दै प्रश्न गरेका थिए ।
सोही प्रश्नको जवाफ दिदै वस्नेतले बालेनलाई सबैको घरको नक्सा हेर्ने भुत चढेको भन्दै आफ्नो घरको नक्सा हेर्ने भए भक्तपुरको सूर्यविनायकमा काजमा आउन भनेका हुन् । उनले बालेनलाई भत्काउने र ध्वंश गरेर हिरो बन्छु भन्ने लागेको होला भन्दै दुई/चार सय फेसबुके फ्यान भए भन्दैमा नमात्तिन पनि चेतावनी दिएका छन् ।
बस्नेतले डोजरमा मेयरहरु नचढेर ड्राईभर चढ्ने भन्दै डोजर चलाउने मन भए ड्राइभिङ सिकेर आउन भनेका छन् । बालेनले महानगरभित्र बनेका भवनहरू नक्सा पासअनुसार भए नभएको अनुगमन गर्दै अवैध संरचना भत्काउने अभियानमा सुरु गरेका छन् । यसैक्रममा उनले बिहीबार अल्फाबिटा कम्प्लेक्सले बनाएको अवैध संरचना डोजर लगाएर भत्काए ।
सो कम्प्लेक्सको अवैध संरचना भत्काएपछि नेकपा एमालेका केन्द्रीय सदस्य महेश बस्नेतले घुमाउरो पारामा चेतावनी दिएका छन् । उनले सामाजिक सञ्जाल फेसबुकमार्फत प्रतिक्रिया जनाएपछि बालेनले पनि फेसबुकमै जवाफसहित प्रश्न गरेका छन् ।
