काठमाडौँ । नेकपा एमालेका नेता प्रदीपकुमार ज्ञवालीले काठमाडौँ नियम कानुनविपरीत बनेका संरचनाहरू हट्नुपर्ने र हटाइनु पर्ने बताएका छन् ।
उनले काठमाडौँ महानगरपालिकाका प्रमुख बालेन्द्र शाह (बालेन)को ‘डोजर अभियानको समर्थन गरेका हुन् ।
उनले भने, ‘यो कदम ठिक छ । महानगरले यो गर्न सक्छ । अहिले काठमाडौँमा पार्किङ र भिडभाडको समस्या छ । काठमाडौँमा विभिन्न समस्याहरू छन्, यसलाई बिना भेदभाव महानगरले आफ्नो कदम चाल्न सक्छ ।’
त्यस्तै उनले यस्ता कदम चाल्दा कसैलाई लक्षित गर्न नहुनेमा समेत सचेत गराए । उनले भने, ‘कसैप्रति लक्षित नगरीकन आफू अगाडि बढ्नु महानगरको दायित्व हो ।’
त्यस्तै, एमालेका सांसद महेश बस्नेतको बालेनलक्षित टिप्पणीबारे समेत ज्ञवालीले प्रतिक्रिया दिए । उनले अरू कसैले यसबारेमा दिएको प्रतिक्रिया आफ्नो सरोकारको विषय नभएको बताउँदै उनले भने, ‘अरू कसले के भने भन्ने कुरा मलाई सरोकारको विषय भएन । भाडामा बस्ने कहीँ–कसैलाई सूचना नपुगेको सत्य पनि हुनसक्छ, यसमा कसैले कसैसँग जुहारी खेल्नुपर्ने आवश्यक ठान्दिनँ म । कसै–कसैलाई बाध्यात्मक अवस्था छ र छोटो अवधि दिनु भनेको खण्डमा त्यसमा महानगरले सोच्नुपर्ने कुरा पनि थियो ।’
उनले नक्सा विपरीतका संरचना हट्दा कुनै दुख नमान्न समेत आग्रह गरे । उनले काठमाडौँमा अवैध संरचना बन्ने र नक्सा पास नगरीकन संरचना थप्ने प्रवृत्तिले महानगरलाई मात्र होइन, देशको राजधानीलाई गम्भीर असर पुगेको बताए । मकालु खबरबाट
