खोटाङ, २४ भदौ । रोजगारीका सिलसिलामा दुबई पुगेका खोटाङको दिक्तेल रुपाकोट मझुवागढी नगरपालिका–१४ बुइपा दम्कुका मेखराज ढकालको आफ्नै साथीको छुरी प्रहारबाट मृत्यु भएको छ । अबुधाबी अलदाफ्रा स्थित एएमबि हेरटेल एलएलसी नामक कम्पनीमा कार्यरत ढकालको बाग्लुङको निसीखोला गाउँपालिका–६, निसीका दिलबहादुर बुढाको छुरी प्रहारबाट मृत्यु भएको हो ।
सेप्टेम्बर २ को राती बुढाले छुरी प्रहार गर्दा गम्भीर घाइते भएका ढकालको उपचारका लागि अस्पताल लैजाने क्रममा बाटैमा मृत्यु भएको अबुधाबीस्थित नेपाली राजदुताबासले जनाएको छ । दुई जनाबीचमा ‘डिस्कस’ चलेको र सुत्न गएकोबेला वाथरुमछेउमा बसिरहेका बुढाले ढकाललाई छातीमा छुरा प्रहार गरेको दाजु वशन्त ढकालले जानकारी दिनुभयो ।
घट्नास्थलमा ४६ मिनेटपछि मात्र प्रहरी पुगेको थियो । एम्बूलेन्समा राखेर अस्पताल लैजानेक्रममा करिब ८÷१० मिनेटपछि ढकालको मृत्यु भएको थियो । छुरी प्रहार गर्ने बुढालाई घटना लगत्तै प्रहरीले पक्राउ गरेको छ ।
ढकाल चार वर्षअघि रोजगारीका सिलसिलामा दुबई पुगेका थिए । उनी ६ महिनाअघि छुट्टी मनाउन घर आएर दुबई फर्केका थिए । एयर अरबियामार्फत ल्याइएको शवलाई शुक्रबार पशुपति आर्यघाटमा दाहसंस्कार गरिएको खोटाङ सेवा समाज दुबईका मिडिया प्रमुख नारायण बस्नेतले जानकारी दिनुभयो । मृतक ढकालको घरमा बृद्धावस्थाका आमाबुबा, दाजुभाउजू र दिदी छन् ।
