खोटाङ, १५ असोज । हलेसी तुवाचुङ नगरपालिका–१ बाहुनीडाँडास्थित कदुवा नजिकैको घुम्तीमा गुडिरहेको बसमा आगलागी भएको छ । काठमाडौँबाट यात्रु लिएर खोटाङतर्फ आइरहेको बा ३ ख ८९८१ नम्बरको यात्रुबाहक बसमा आज (शनिबार) साढे चार बजेको समयमा एक्कासी आगलागी भएको हो ।
बसमा आगलागी हुँदा कुनै मानवीय क्षति भने, नभएको घटनास्थलमा पुगेका प्रहरीले जनाएको छ । प्रहरीका अनुसार गुडिरहेको बसमा एक्कासी आगलागी हुँदा बससहित बसमा भएका सामानहरु जलेर नष्ट भएको छ ।
काठमाडौँबाट दिक्तेल हिँडेको बस बीच बाटोमै आगलागी भएपछि त्यसमा सवार यात्रुहरु अलपत्र परेका छन् । आगलागी भएको बसमा ३२ जना यात्रु रहेको र उनीहरुलाई गन्तव्यसम्म पु¥याउन दिक्तेलबाट अर्को बस पठाउने तयारी भइरहेको खोटाङ यातायात प्रा.लि.का महासचिव रामकुमार हिङ्माङले जानकारी दिनुभयो ।
गुड्दै गरेको बसको इन्जिनबाट आगो उठेको यात्रुहरुले बताएका छन् । आगलागी भएको बस पुरानो भएको र उक्त बसको इन्जिनमा जान गरिएको बिजुलीको तार एकअर्कामा जोडिदा आगलागी भएको हुन सक्ने जिल्ला प्रहरी कार्यालय खोटाङका प्रवक्ता प्रहरी निरीक्षक रामबालक रायले जानकारी दिनुभएको छ ।
