खोटाङ, १६ माघ । दिक्तेल रुपाकोट मझुवागढी नगरपालिका–६ नेर्पामा किबीको जाम (खुदो) उत्पादन शुरु गरिएको छ । स्थानीय सातजना उद्यमीहरुले चिमाल फलफूल प्रशोधन उद्योग दर्ता गरेर किबीको जाम उत्पादन शुरु गरेका हुन् ।
उद्योगबाट उत्पादित जाम दिक्तेल बजार तथा आसपासका क्षेत्रमा बिक्री हुँदै आएको सञ्चालक समितिका अध्यक्ष शुभचन्द्र राईले जानकारी दिनुभयो । “परीक्षण चरणमै रहेको जामले राम्रो बजार मूल्य पाएको छ”, उहाँले भन्नुभयो, “पहिलो चरणमा ५०० ग्रामको रु ३०० र ७०० ग्रामको रु ४०० मा बिक्री गर्ने गरिएको छ ।”
जाम, जुस, स्क्वास, क्याण्डी लगायत १३ प्रकारका खाद्यान्न उत्पादन गर्नेगरी प्रशोधन उद्योग सञ्चालन गरिएको जनाइएको छ । किबी, केरा, आँप, आल्चा, नास्पाती, अम्बा, मेहेल लगायतका फलफूलबाट विभिन्न प्रकारका खाद्य पदार्थ उत्पादन गर्नेगरी उद्योग स्थापना गरिएको समितिका सचिव कविकुमार राईले जानकारी दिनुभयो ।
गत मङ्सिर–२० गते घरेलु तथा साना उद्योग कार्यालय खोटाङबाट स्वीकृति लिएको फलफूल प्रशोधन उद्योगमा रु २५ लाख बढी लगानी हुने जनाइएको छ । शुरुवाती चरणमा रु पाँच लाख लगानीमा उपकरण खरिद गरेर उद्योग स्थापना गरिएको अध्यक्ष राईले जानकारी दिनुभएको छ ।
जिल्लामै पहिलो पटक फलफूल प्रशोन उद्योग स्थापना भएपछि कृषकहरु हर्षित भएका छन् । आफूले उत्पादन गरेका किबी, केरा, आँप, आल्चा, नास्पाती, अम्बा, मेहेल लगायतका फलफूल खेर नजाने भएपछि कृषकहरु हर्षित भएका हुन् ।
जिल्लाको प्रमुख व्यापारिक केन्द्र दिक्तेल बजार नजिकै खोलिएको उद्योगमा जिल्लाका विभिन्न ठाउँमा उत्पादन गरिएका फलफूल सङ्कलन गरेर प्रशोधन गर्ने लक्ष्य राखिएको छ । प्रशोधन उद्योग अभावमा जिल्लाका कृषकले उत्पादन गरेका फलफूल यसअघिसम्म बिना उपयोग खेर जाने गरेको थियो ।
दश स्थानीय तह रहेको जिल्लामा पछिल्लो समय सबैभन्दा बढी किबी उत्पादन हुन थालेको छ । केही वर्षअघिदेखि मात्र उत्पादन हुन थालेको किबी अहिले प्रति केजी रु २५० मा फार्मबाटै जिल्ला बिक्री हुँदै आएको छ ।
जिल्लाका कृषकले उत्पादन गरेका किबी बाहिरी जिल्लासमेत निर्यात हुँदै आएको छ । जिल्लामा उत्पादित किबी पूर्वी तराई तथा राजधानी काठमाडौँमा सबैभन्दा बढी निर्यात हुने गरेको कृषकहरुले बताएका छन् ।
