खोटाङ, १० जेठ । खोटाङ र उदयपुर जोड्ने सुनकोशी नदीस्थित धाप्लाङघाटमा निर्माणाधीन मोटरेबल पक्की पुल चार वर्षअघि बनिसक्नुपथ्र्यो । वि.सं. २०७६ साल असार–२९ गतेभित्र सम्पन्न गर्नेगरी वि.सं. २०७३ असार–३० गते रसुवा–एसएनएस–पप्पु जेभी निर्माण कम्पनीले धाप्लाङघाट पुल निर्माणको जिम्मा लिएको हो ।
खोटाङको बराहपोखरी गाउँपालिका–२ सुन्तले र उदयपुरको त्रियुगा नगरपालिका–१४ साउने जोड्ने सुनकोशी नदीको धाप्लाङघाटस्थित निर्माणाधीन पुलको काम रोकेर अहिले डिजाईन परिवर्तनको प्रक्रिया अघि बढाइएको छ । वेल फाउण्डेसन प्रविधिको मोटरेबल पक्की पुल निर्माण शुरु गरिएको धाप्लाङघाटमा पाइल फाउण्डेसन प्रविधिको पुल निर्माण गर्ने गरी डिजाइन परिवर्तको प्रक्रिया अघि बढाइएको हो ।
वि.सं. २०७६ साल असारमा बनिसक्नुपर्ने २०० मिटर लामो मोटरेबल पक्की पुलको ठेक्का लागेको सात वर्षपछि ठेकेदार कम्पनीको आग्रहमा डिजाइन परिवर्तन गर्न लागिएको सडक विभाग पुल सेक्टर धरान, सुनसरीका प्रमुख इन्जिनियर प्रदीप भण्डारीले बताउनुभएको छ । “ठेकेदार कम्पनीले पुरानो डिजाइनमा काम गर्न नसक्ने बताएको छ । तोकिएको समयमा निर्माणको काम नभएपछि सम्झौता गर्दा दिइएको पेश्की बापतको रकमबाट रु चार करोड २२ लाखसमेत फिर्ता गराइएको छ”, उहाँले भन्नुभयो, “जसरी भएपनि पुल त बनाउनै प¥यो ! पुरानो डिजाइनको चारवटा वेल फाउण्डेसनको ठाउँमा चारवटा पाइल फाउण्डेसन बनाउने तयारी स्वरुप डिजाइन परिवर्तनको काम शुरु गरिएको छ ।”
खोटाङको बराहपोखरी, जन्तेढुङ्गा, खोटेहाङ गाउँपालिका तथा भोजपुरका केही स्थानीय बासिन्दालाई पूर्वी तराईका विभिन्न शहरसँग जोड्ने पुल वि.सं. २०७४ भदौ–३१ गते तत्कालीन प्रधानमन्त्री एवम् नेपाली काँग्रेसका सभापति शेरबहादुर देउवाले शिलान्यास गर्नुभएको थियो । धाप्लाङघाट निर्माण शुरु गरिएको मोटरेबल पक्की पुल बनिसक्नुपर्ने समयमा डिजाइन परिवर्तनको प्रक्रिया थाल्नुमा ठेकेदार र कर्मचारीको मिलेमतो रहेको स्थानीय बासिन्दाले आरोप लगाएका छन् ।
निर्माणको काम थालेको लामो समयसम्म धाप्लाङघाट पुल निर्माणको काम सम्पन्न नहुँदा दक्षिणी क्षेत्रका स्थानीय बासिन्दा सबैभन्दा बढी समस्या भएको बराहपोखरी गाउँपालिकाका प्रमुख शालिकराम बञ्जराले बताउनुभएको छ । “सुनकोशीस्थित धाप्लाङघाटमा मोटरेबल पक्की पुल नहुँदा आयात तथा निर्यात गरिने दैनिक उपभोग्य सामग्री पुल वारि र पारी दुवैतर्फ लोडअनलोड गर्नुपर्ने अवस्था छ । यसले सबैभन्दा बढी कृषक मारमा परेका छन्”, उहाँले भन्नुभयो, “दक्षिणी क्षेत्रका स्थानीय बासिन्दाको दैनिक जीवनसँग जोडिएको धाप्लाङघाटको पक्की पुल निर्माणमा ढिलाइ हुनु दुःखद विषय हो । यसमा सम्बन्धित निकायले ध्यान दिन जरुरी छ ।”
धाप्लाङघाटमा मोटरेबल पुल नहुँदा सबैभन्दा बढी कृषि उपज निर्यातका क्रममा लोडअनलोड गर्दा किसानले थप व्यायभार खेपिरहेका छन् । मोटरेबल पक्की पुल निर्माणको काम शुरु गरिएको धाप्लाङघाटमा सात वर्षपछि पुनः डिजाइन परिवर्तन गर्न थालिएपछि उक्त ठाउँमा कहिले पक्की पुल सञ्चालनमा आउने टुङ्गो छैन ।
धाप्लाङघाटमा निर्माणाधीन मोटरेबल पक्की पुल अलपत्र पार्ने ठेकेदारलाई कालोसूचीमा राखेर कारबाहीको प्रक्रिया अघि बढाउनुपर्नेमा मिलेमतोमा छुट दिइएको खोटाङ क्षेत्र नं. २ (ख)बाट निर्वाचित प्रदेशसभा सदस्य एवम् नेपाली काँग्रेस कोशी प्रदेश समितिका महामन्त्री भूपेन्द्रकुमार राईले बताउनुभएको छ । “धाप्लाङघाट पुल निर्माणको काम समयमा नसकिएपछि विभिन्न ठाउँमा खबरदारी गर्ने काम भइरहेको छ । पुरानो डिजाइनमा ठेकेदारले कामै नगर्ने बताएको रहेछ”, उहाँले भन्नुभयो, “डिजाइन परिवर्तन गरेर भए पनि तत्काल निर्माणको काम अगाढि बढाउन भनिएको छ । सम्भवतः अर्को आर्थिक वर्षबाट नयाँ डिजाइनमा पुल निर्माणको काम शुरु हुन्छ ।”
धाप्लाङघाट पुल निर्माणमा ढिलाइ हुनुको प्रमुख सडक विभागका इन्जिनियरको कमजोरी रहेको एसएनएसका प्रबन्ध सञ्चालक जयराम लामीछानेले आरोप लगानुभएको छ । “सडक विभागका इन्जिनियरको कमजोरीका कारण यसअघि तोकिएको समयमा पुल निर्माणको काम सम्पन्न गर्न सकिएन । स्थलगत अध्ययन नगरी तयार पारिएको डिजाइनमा हामीले काम थालेका रहेछौँ”, उहाँले भन्नुभयो, “काम गर्दै जाँदा सो डिजाइनले त्यहाँ मोटरेबल पक्की पुल निर्माण हुने सम्भावना देखिएन । पटकपटकको आग्रहपछि अहिले डिजाइन परिवर्तनको काम शुरु भएको छ । डिजाइन परिवर्तन भएर आएपछि नयाँ टोली परिचालन गरेर निर्माणको कामलाई तीव्रता दिने तयारी गरिएका छौँ ।”
जिल्लाको दक्षिणी क्षेत्रका स्थानीय बासिन्दाको प्रमुख व्यापारिक केन्द्र गाईघाट बजार आवतजावत गर्ने सबैभन्दा छोटो दूरीको सडकखण्ड अन्तरगत पर्ने धाप्लाङघाटस्थित सुनकोशी नदीमा झोलुङ्गे पुल सञ्चालनमा छ । लामो समयदेखि सञ्चालनमा रहेको सोही झोलुङ्गे पुलमार्फत दैनिक उपभोग्यवस्तुदेखि निर्माण सामग्रीसम्म पिठ्युँमा बोकेर वारपार गराउनुपर्ने स्थानीय बासिन्दाको बाध्यता रहेको छ ।
