खोटाङ, ३ भदौ । दिक्तेल रुपाकोट मझुवागढी नगरपालिका–११ खार्मीस्थित बोहोरीबोटका मिलन राईले वि.सं. २०७७ सालमा माध्यमिक शिक्षा परीक्षा (एसइई) उत्तिर्ण गर्नुभएको छ । खार्मीस्थित कालिका माध्यमिक विद्यालयबाट सोह्र वर्षको उमेरमा ‘ए’ ग्रेड ल्याएर एसइई उत्तिर्ण गर्नुभएका मिलनले घरको कमजोर आर्थिक अवस्थाका कारण उच्च शिक्षा अध्ययन गर्ने मनस्थिति बनाउनुभएन ।
गाउँका अधिकांश दाजु तथा काकाहरु वैदेशिक रोजगारीमा रहेकाले मिलनको रोजाइ पनि विदेश जाने नै रह्यो । वि.सं. २०६१ वैशाख–९ गते बुबा कर्णबहादुर र आमा देउकुमारी राईको कोखबाट कान्छो सन्तानको रुपमा जन्मनुभएका मिलनले एसइईको नतिजा प्रकाशन भएको केही समयपछि राहदानी (मेसिन रिडेबल पासपोर्ट एमआरपी) बनाएर काठमाडौँ जानुभएका मलेसिया जाने सोच बनाउनुभएको थियो ।
मलेसिया जानका लागि आवश्यक कागजात बोकेर काठमाडौँ पुग्नुभएका मिलनले काठमाडौँको बानेश्वरस्थित भण्डारी अफ मेडिसियन मेनपावर कम्पनीमा राहदानीसमेत बुझाउनुभयो । वैदेशिक रोजगार सम्बन्धी काम गर्दै आएका खोटाङकै केपिसालगढी गाउँपालिकाका कृष्ण राईलाई राहदानी बुझाउनुभएका मिलनलाई मेनपावर कम्पनीले रु तीन लाख ५० हजार धरौटी रकम लाग्ने सुनायो ।
नेपाल सरकारसँगको सम्झौता अनुसार ज्यामी काममा मलेसिया जान का लागि फ्रि भिजा, फ्रि टिकेट भनिए पनि मेनपावर कम्पनीले त्यतिका पैसा लाग्ने सुनाएपछि मिलनको सोच एकाएक बदलियो । अहिले भर्खर १९ वर्ष लाग्नुभएका मिलनले मेनपावर कम्पनीको कुरा सुन्नासाथ गाउँ फर्किएर आफ्नै ठाउँमा केही गर्ने सपना बुन्न थाल्नुभयो ।
विदेश जाने अनि राम्रो कमाइ गर्ने सोच बनाएर काठमाडौँ पुग्नुभएका मिलनले मनमनै विभिन्न विकल्पहरु खोज्नुभयो । आफ्नै गाउँमा केही गर्न सकिन्छ कि भन्ने बारेमा युट्युबहरु खोतल्न थाल्नुभयो ।
परम्परागत खेती प्रणाली अपनाएर जीवन निर्वाह गर्दै आइएको खार्मीमा मिलनले व्यवसायिकरुपमा सूर्यमुखी फूलको खेती गर्ने निधो गर्नुभयो । मकै, कोदो र आलु खेती हुँदै आएको चार रोपनी जग्गामा सोलुखुम्बूबाट खरिद गरेर ल्याएको छ केजी सूर्यमुखी फूलको दल राखेर व्यवसायिक खेती शुरु गर्नुभयो ।
अहिले मिलनले लगाउनुभएको व्यवसायिक सूर्यमुखी फूल ढकमक्क फुलेको छ । सँधियारले आसपासको जग्गामा लगाएको मकै र कोदो फलिरहँदा मिलनको जग्गामा पँहेपुर भएर ढकमक्क फुलेको सूर्यमुखी फूलको खेती देख्दा रमित लाग्दो छ ।
युट्युबमा हेरेर बिना परीक्षण व्यवसायिक रुपमा शुरु गरिएको सूर्यमुखी फूलको खेती राम्ररी सप्रिएकाले आगामी वर्ष थप वृद्धि गर्ने तयारी गरिएको मिलनले बताउनुभो । “विदेश जाने सोच बनाएको थिए । फ्रि भिजा, फ्रि टिकेट भनिएको ठाउँमा पनि दलालहरुले ठग्दा रहेछन्”, उहाँले भन्नुभयो, “त्यतिका पैसा खर्च गरेर अर्काको देशमा पसिना बगाउनुभन्दा आफ्नै ठाउँमा केही गरौँ भन्ने सोच आयो । परीक्षण कालमै राम्रो उत्पादन हुने देखिएको छ । आगामी दिनमा थप विस्तार गर्ने तयारीमा छु ।”
फल लाग्दै गरेको सूर्यमुखी फूल पाक्ने बित्तिकै सोही जग्गामा तोरी खेती गर्ने तयारी गरिएको मिलनले जानकारी दिनुभयो । “परम्परागत खेतीले जीवन निर्वाह बाहेक केही गर्न सकिँदैन । गाउँमा आम्दानीको अन्य स्रोत पनि छैन । आम्दानीको स्रोत वृद्धि गर्न गाउँमै तेलहनजन्य खेतीलाई व्यवसायिक बनाउने सोचमा छु”, उहाँले भन्नुभयो, “आफ्नो गाउँमा खपत हुने खानेतेल आफ्नै गाउँमा उत्पादन गर्नेगरी योजना बनाएको छु । उत्पादित कच्चा पदार्थलाई आफै प्रशोधन गर्नेगरी मिलसमेत खरिद गर्ने तयारीमा छु ।”
नगरपालिकाको कृषि शाखामा आधिकारिक रुपमा सूर्यमुखी कृषि फार्म दर्ता गरेर सूर्यमुखी फूलको व्यवसायिक खेती शुरु गर्नुभएका मिलनलाई आमा र बुबाले समेत साथ दिँदै आउनुभएको छ । परम्परागत कृषि प्रणाली अपनाउँदै आएका छिमेकीहरु समेत मीलनको सूर्यमुखी फूलको व्यवासायिक खेती देखेर सिको गर्ने तयारीमा छन् ।
खार्मीका मिलनले लगाएको सूर्यमुखी फूलको उत्पादनलाई हेरेर आगामी दिनमा त्यहाँका कृषकलाई अनुदानको व्यवस्था गर्ने योजना बनाइएको नगर उपप्रमुख विशन राईले बताउनुभएको छ । “खार्मी, पाथेका र जालपालाई तेलहनजन्य कृषि उत्पादनको पकेट क्षेत्र बनाउने तयारी गरिएको छ । मिलन भाइले सूर्यमुखी फूलको खेती शुरु गर्नुभएको रहेछ”, उहाँले भन्नुभयो, “व्यवसायिक रुपमा कृषि पेशा अपनाउने व्यक्तिलाई प्रोत्साहन गर्न नगरपालिकाले अनुदानको व्यवस्था गरेको छ । उहाँ (मिलन राई)ले लगाउनुभएको सूर्यमुखी फूलको खेती सफल भएको खण्डमा उहाँलाई नगरपालिकाको तर्फबाट आर्थिक तथा प्राविधिक सहयोग उपलब्ध गराइनेछ ।”
किशोरावस्था ननाघेका मिलनले आफ्नै लगानीमा व्यवसायिक रुपमा सूर्यमुखी फूलको खेती शुरु गरेपछि नगर उपप्रमुख राई कृषि शाखा प्रमुख तेजप्रकाश जैसीसहितका टोली लिएर अवलोकनमा खार्मी पुग्नुभएको थियो । पन्ध्र वडा रहेको यस नगरपालिकाको नवौँ नगरसभाले खार्मी, पाथेका र जालपालाई तेलहनजन्य खेतीका लागि पकेट क्षेत्र बनाउने घोषणा गरेको अवस्थामा मिलनले शुरु गरेको सूर्यमुखी फूलको खेती सप्रिएको खबर पाएपछि उपप्रमुख राईको टोली अवलोकनमा खार्मी गएको हो ।
