स्वदेश तथा विदेशी चित्रकारले खोटाङलाई नै चित्रमा उतारेपछि….!

खोटाङ, २० असोज । लातभियाकी चित्रकार आन्दा पैकानेले किराँत ऐतिहासिकस्थल मझुवागढीमा आयोजित कार्यक्रम हेर्न बच्चासहित आएका महिलाको चित्र क्यानभासमा दुरुस्त उतार्नुभयो । एक पटक हेरेको भरमा चित्रकार पैकानेले क्यानभासमा उतार्नुभएको चित्र हेर्दा ती महिलालाई देख्ने जो कोहीले पस्टै चिन्छन् ।

दिक्तेल रुपाकोट मझुवागढी नगरपालिका खोटाङ र धनु आर्ट स्टुडियो काठमाडौँले दिक्तेलमा आयोजना गरेको ‘मुन्दुम अन्तर्राष्ट्रिय प्लेन एयर चित्रकला कार्यशाला तथा कला प्रदर्शनी–२०८०’ कार्यक्रममा काठमाडौँबाट आउनुभएका चित्रकार रतनकुमार राईले मझुवागढी कै चित्र डिजिटल क्यामेराले खिचेको तस्वीर जत्तिकै प्रस्ट देखिनेगरी क्यानभासमा उतार्नुभएको छ । किराँती राजा रणवीर हाङले वि.सं. १८०४ सालसम्म राज्यसत्ता सञ्चालन गर्नुभएको ऐतिहासिकस्थल मझुवागढीको भग्नावशेष हेरेर चित्रकार राईले क्यानभासमा त्यसैको चित्र जस्ताको तस्तै उतार्नुभएको हो ।

अमेरिकाकी चित्रकार एवम् प्रोफेसर जोय वल्फले दिक्तेल बजारस्थित किराँतचोकको एउटा घरको बार्दलीबाट देखिने दृश्यलाई क्यान्भासमा उतार्नुभएको छ । घरको बार्दलीमा कुर्सी राखेर बस्दा अगाडि पूर्वतर्फ जे दृश्य देखियो, त्यही दृश्यलाई चित्रमा उतार्न तल्लिन् प्रोफेसर वल्फले डेढ घण्टाभित्रै आफ्नो अगाडि देखिएका दृश्यको दुरुस्त चित्र क्यान्भासमा तयार उतार्नुभएको छ ।

पाँच दिने चित्रकला कार्यशाला तथा कला प्रदर्शनी कार्यक्रममा सहभागी हुन काठमाडौँबाट खोटाङ आउनुभएका चित्रकार विजय थापाले पनि सोही घरको बार्दलीबाट अगाडि देखिएका दृश्यलाई क्यान्भासमा जस्ताको तस्तै उतार्नुभएको छ । चित्रकार थापाले थापाले दिक्तेल बजार प्रवेशद्धार र त्यसको पृष्ठभूमिलाई तस्वीरझैँ उतार्नुभएको हो ।

यही असोज–१७ गतेदेखि दिक्तेलमा सञ्चालन भएको कार्यक्रममा स्वदेशी तथा विदेशी ख्यातिप्राप्त चित्रकारले मझुवागढी, किराँतचोक, भवनगैरा, हाटडाँडा, शंखधर शाख्वाचोक, शुभम् फाउण्डेशन र जालपा पुगेर फरकफरक दृश्यका प्रत्यक्ष चित्र कोरेका छन् । कतिपय चित्रकारले अगाडि जे देखिन्छ त्यही दृश्यलाई क्यान्भासमा उतारेका छन् भने कतिपयले आफ्नो मोबाइलमा कैँद गरिएका तथा जिल्ला अन्य स्थानीय तहबाट सङ्कलन गरिएका राम्रा दृश्यलाई र कोहीले आफ्नै इच्छाअनुसार चित्रहरु कोरेका छन् ।

स्वदेश तथा विदेशबाट आएका ख्यातिप्राप्त चित्रकारले उतारेका चित्रमा समग्र खोटाङको तस्वीर झल्किएको नगर प्रमुख तीर्थराज भट्टराईले प्रतिक्रिया दिनुभएको छ । “चित्रकला कार्यशाला तथा कला प्रदर्शनी कार्यक्रमले नगरपालिकाको मात्र नभइ समग्र खोटाङको ऐतिहासिक, धार्मिक तथा पर्यटकीयस्थलहरुलाई राष्ट्रिय तथा अन्तर्राष्ट्रिय रुपमा परिचित गराउँदै यहाँको सँस्कृति, सभ्यता, धार्मिक तथा पर्यटकीय क्षेत्रको प्रवद्र्धनमा टेवा पु¥याउने हाम्रो प्रमुख उद्देश्य हो”, उहाँले भन्नुभयो, “नेपालसहित १४ देशबाट आएका ख्यातिप्राप्त चित्रकारहरुले समग्र खोटाङको चित्र कोरेका छन् । यसमा हामी सफल भएका छौँ ।”

चित्रकला कार्यशाला तथा कला प्रदर्शनीमा नेपालसहित अष्ट्रेलिया, बंगलादेश, भुटान, चीन, जापान, इजिप्ट, भारत, लातभिया, लिथुआनिया, दक्षिण कोरिया, अमेरिका, युक्रेन र भियतनामका गरी ४३ जना चित्रकार खोटाङ आएका छन् । स्वदेश तथा विदेशमा ख्यातिप्राप्त चित्रकारले उतारेका पेन्टिङ चित्रलाई जिल्लाको प्रमुख व्यापारिक केन्द्र दिक्तेल बजारस्थित सरस्वती नमूना माध्यमिक विद्यालयको प्राङ्गणमा साँगीतिक कार्यक्रम, स्थानीय परिकारको स्टल, साँस्कृतिक झाँकी, नृत्य प्रदर्शनसहित प्रदर्शनी गरिएको छ ।

स्वदेश तथा विदेशमा समेत ख्यातिप्राप्त चित्रकारले तयार पारेका चित्र प्रदर्शनी कार्यक्रममा जिल्लाका विभिन्न विद्यालयमा अध्ययनरत छात्र÷छात्राले तयार पारेका चित्रलाई पनि समावेश गराइएको नगरपालिकाले जनाएको छ । जिल्लाको धार्मिक, साँस्कृतिक र पर्यटकीय क्षेत्रको विकास गर्दै पर्यटन प्रवद्र्धन गर्ने उद्धेश्यले नगरपालिकाको रु १८ लाख खर्चमा चित्रकला कार्यशाला तथा प्रदर्शनी आयोजना गरिएको हो ।

जिल्लामै पहिलो पटक दिक्तेलमा आयोजना गरिएको प्रत्यक्ष चित्रकला कार्यशाला तथा प्रदर्शनी कार्यक्रम हजारौँले अवलोकन गरेका छन् । प्रत्यक्ष चित्रकला कार्यशाला तथा प्रदर्शनी कार्यक्रम अवलोकन गर्न आएका अधिकांश सहभागीले नगरपालिकाको यो कार्यक्रम प्रभावकारी भएको प्रतिक्रिया दिएका छन् ।

स्वदेश तथा विदेशका चित्रकारले क्यानभासमा उतारेका लाइभ चित्रकलालाई केही महिनापछि काठमाडौँस्थित आर्ट ग्यालरीमा लगेर प्रदर्शनी गर्ने योजना बनाइएको नगर उपप्रमुख विशन राईले बताउनुभएको छ । “स्वदेश तथा विदेशका ख्यातिप्राप्त चित्रकारले उतारेका चित्रहरु हाम्रो नगरपालिकाको सम्पत्ति हो । यसलाई नगरपालिकाको लगानीमा सङ्ग्रहालय बनाएर राख्ने योजना बनाएका छौँ”, उहाँले भन्नुभयो, “चित्रकारले प्रत्यक्ष कोरेका यी चित्रहरु नगरपालिकाको आम्दानीको आन्तरिक स्रोत हो । तत्कालका लागि प्रत्यक्ष फाइदा नदेखिए पनि हामीले ईतिहास निर्माण गरेका छौँ ।”

नगरपालिकाले आयोजना गरेको ‘मुन्दुम अन्तर्राष्ट्रिय प्लेन एयर चित्रकला कार्यशाला तथा कला प्रदर्शनी–२०८०’ कार्यक्रम ऐतिहासिक भएको बुद्धिजीवीहरुको प्रतिक्रिया छ । चित्रकारहरुले क्यानभासमा कोरेका चित्रहरु सामाजिक सञ्जाल फेसबुकमा राख्दै उनीहरुले आयोजकलाई धन्यवाद दिइरहेका छन् ।

नेपाल सरकारका सङ्घीय खेलकुदमन्त्री डिगबहादुर लिम्बुको प्रमुख आतिथ्यतामा शनिबार आयोजना गरिएको समापन कार्यक्रममा ‘राई ईज किङ’ उपाधि प्राप्त चर्चित गायक राजेशपायल राईले विशेष साँगीतिक प्रस्तुति दिनुभएको थियो । गायक राईको साँगीतिक प्रस्तुतिमा स्वदेश तथा विदेशका चित्रकारहरु छमछमी नाचेका थिए ।