खोटाङ, २२ असोज । गोठालो गएकी आठ वर्षीया बालिकालाई बलात्कार गर्ने प्रयास गरेको आरोपमा खोटाङका एक युवक पक्राउ परेका छन् । हजुरआमा (बजू)सँग गोठालो गएकी बालिकालाई जबरजस्ती करणी गर्ने प्रयास गरेको अभियोगमा हलेसी तुवाचुङ नगरपालिका–१० अर्खौलेका २० वर्षीय शिव श्रेष्ठ पक्राउ परेका हुन् ।
गोठालो गएकी बालिकालाई यही असोज–२० गते अमला टिप्न जाँदा बलात्कार गर्ने प्रयास गरेको भन्दै आफन्तले दिएको उजुरीको आधारमा आरोपितलाई पक्राउ गरिएको जिल्ला प्रहरी कार्यालय खोटाङका प्रवक्ता प्रहरी निरीक्षक बेनु कार्कीले जानकारी दिनुभएको छ । घटना भएकै दिन आफन्तले दिएको उजुरीको आधारमा पक्राउ परेका श्रेष्ठबिरुद्ध मुद्धा दर्ता गरेर जिल्ला अदालत खोटाङबाट आज (सोमबार) चार दिनको म्याद थप गरेर अनुसन्धान शुरु गरिएको प्रहरीले जनाएको छ ।
बालिकाको आफन्तले दिएको जानकारी अनुसार गोठालो गएकी बालिकाले जङ्गलमा हजुरआमासँग अमला टिपिमागेकी थिइन् । आफू रुख चढ्न नसक्ने भन्दै हजुरआमाले आरोपित युवकलाई बोलाएर रुखबाट अमला झारिदिन आग्रह गरेकी थिइन् ।
हजुरआमाको आग्रहपछि बालिका लिएर अमला झार्न गएका श्रेष्ठबाट यौन दुव्र्यवहार भएको उजुरीमा उल्लेख छ । अमला टिप्न गएको १०÷१५ मिनेटसम्म नफर्किएपछि हजुरआमाले बोलाएपछि बालिका बलात्कार हुनबाट जोगिएको आफन्तले बताएका छन् ।
कपडा खोलिसकेको बेला हजुरआमाले बोलाएपछि आरोपित युवक यौन दुव्र्यवहारबाट पछि हटेको प्रहरीको प्रारम्भिक अनुसन्धानबाट खुलेको छ । ‘थरथर’ काम्दै घर पुगेकी बालिकाले आफ्नो आमालाई भनेपछि घटना बाहिरिएको स्थानीयले बताएका छन् ।
