खोटाङ, २३ पुस । दिक्तेल रुपाकोट मझुवागढी नगरपालिकाले शिक्षाको गुणस्तर सुधार गर्ने उपायको खोजीमा शुरु गरेको छ । सामुदायिक विद्यालयको घट्दो आकर्षणलाई उकास्नका लागि नगरपालिकाले नगरभित्रका राजनीतिक दलका प्रतिनिधि, वडा शिक्षा समिति, प्रधानाध्यापक, विद्यालय व्यवस्थापन समितिका अध्यक्ष, शिक्षक, पूर्व प्रधानाध्यापक, व्यवस्थापन समितिका पूर्व पदाधिकारी, विद्यार्थी लगायतलाई एक ठाउँमा भेला गरेर शैक्षिक बहस शुरु गरेको हो ।
पछिल्लो समय सामुदायिक विद्यालयको गुणस्तर खस्किदै गएको अवस्थामा त्यसको जड पत्ता लगाउने लक्ष्यका साथ शैक्षिक बहस तथा अन्तरक्रियात्मक कार्यक्रम शुरु गरिएको नगर प्रमुख तीर्थराज भट्टराईले बताउनुभएको छ । “सामुदायिक विद्यालयमा राज्यको करोडौँ लगानी छ । उच्च शिक्षा हाँसिल गरेका र तालिम प्राप्त शिक्षकहरुको व्यवस्था छ । तर, विद्यालयमा विद्यार्थी सङ्ख्या घटिरहेको छ । कतिपय कक्षा रित्तो बन्ने अवस्थामा पुगेको छ । बाँकी विद्यार्थीलाई गाउँमै रोक्ने वातावरण बन्न सकेन भने केही वर्षपछि विद्यालय नै रित्तो बन्ने अवस्था आउने सङ्केत देखिन थालेका छन्”, उहाँले भन्नुभयो, “तह अनुसार विद्यार्थीको क्षमता विकास हुन सकेको छैन । यिनै समस्या हल गर्ने प्रयास स्वरुप शैक्षिक बहस अन्तरक्रियात्मक कार्यक्रम शुरु गरिएको हो ।”
बसाइँसराइँ, निजी स्कूल, जन्मदर रोकथाम, वैदेशिक रोजगार लगायतका कारण सामुदायिक विद्यालय रित्तिदै गएको अवस्थामा नगरपालिका विद्यार्थीलाई गाउँकै सामुदायिक विद्यालयमा बस्ने वातावरण बनाउने उपायको खोजीमा जुटेको देखिन्छ । नगरभित्र सञ्चालित सामुदायिक विद्यालयमा कैयौँ समस्याहरु देखा परिरहेका छन् ।
नगरपालिकाले आइतबार आयोजना गरेको सर्वपक्षीय शैक्षिक बहसको माध्यमबाट सामुदायिक विद्यालयको शिक्षाको गुणस्तर सुधार गर्ने राय सुझाव सङ्कलन गरेको छ । कार्यक्रममा सहभागीमध्ये ३२ जनाले सामुदायिक विद्यालय सुधार गर्ने विषयमा राय दिएका छन् । कतिपयले राजनीति सप्रिए स्वतः शिक्षामा सुधार आउने धारणा राखेका छन् । केहीले गाउँलाई बस्न लायक बनाइनुपर्ने सुझाव दिएका छन् ।
यस्तै, शिक्षक, जनप्रतिनिधि लगायतको छोराछोरीलाई अनिवार्य सामुदायिक विद्यालयमा पढाउनुपर्ने, आवासीय शिक्षाको प्रबन्ध मिलाउनुपर्ने, अभिभावक शिक्षाको व्यवस्था गर्नुपर्ने, समय सान्दर्भिक पाठ्याक्रम लागू गर्नुपर्ने लगायतका सुझाव आएको छ । सुझाव राय टिपोट गर्दै प्रतिवेदन तयार गर्नका लागि शुभम् फाउण्डेसनका कार्यकारी निर्देशक सुर्यबहादुर राई संयोजक तथा पञ्च मावि दिक्तेलका प्रधानाध्यापक लक्ष्मीप्रसाद खनाल र नगरपालिकाको शिक्षा शाखाका प्राविधिक सहायक प्रेम केसी सदस्य रहेको समितिलाई जिम्मेवारी दिइएको छ ।
कार्यक्रममा व्यक्त गरिएका सुझावको आधारमा पाँच दिनभित्र प्रतिवेदन पेश गर्न समय दिइएको नगर प्रमुख भट्टराईले बताउनुभएको छ । “न काखमा बच्चा छ न कोखमा । पाँच सात वर्षपछि स्कूल रित्तो हुने अवस्था आउँदैछ । शैक्षिक गुणस्तर सुधारका कारणहरु खोज्न थालेका छौँ”, उहाँले भन्नुभयो, “प्राप्त राय सुझाव सङ्कलन गरेर कार्यान्वयनमा जान्छौैँ । तीन सदस्यीय टिपोट समितिले बुझाएको प्रतिवेदनको आधारमा पुनः पाँच सदस्यीय सुझाव कार्यदल बनाउने र सो कार्यदलमार्फत वडावडामा पुगेर शिक्षक, अभिभावकबाट सुझाव सङ्कलन गरिन्छ । सो कार्यदलले दिएको सुझाव र निचोडलाई आगामी शैक्षिकसत्रबाट कार्यान्वयनमा ल्याउने योजना बनाएका छौँ ।”
पन्ध्र वडा रहेको यस दिक्तेल रुपाकोट मझुवागढी नगरपालिकाका अधिकांश वडाको ग्रामीण क्षेत्रमा सञ्चालित विद्यालयहरु विद्यार्थी अभावमा सङ्कटमा पर्दै गएको छ । कतिपय विद्यालयमा विद्यार्थीभन्दा शिक्षक बढी देखिन थालेको छ ।
नगरपालिकाभित्र सञ्चालित सामुदायिक विद्यायका विद्यालय व्यवस्थापन समिति अध्यक्ष र प्रधानाध्यापकहरुले शैक्षिक गुणस्तर सुधार गर्ने यसअघि नै प्रतिबद्धता जनाएका थिए । उसबेला मावि, निमावि र आविका विव्यास अध्यक्षहरुले १५ तथा प्रअहरुले १७ वटा बुँदामा शिक्षा सुधारका काम गर्ने नगरपालिकासमक्ष लिखित प्रतिबद्धता जनाएका हुन् ।
वर्तमान जनप्रतिनिधिहरु निर्वाचित भएलगत्तै सामुदायिक विद्यायको शैक्षिक सुधारका लागि पहल थालिए पनि हालसम्म प्रभावकारी कार्यान्वयन भएको छैन । जिल्लाको सबैभन्दा ठूलो स्थानीय तह यो नगरपालिकामा मावि, निमावि र आवि गरी ९३ वटा सामुदायिक विद्यालय सञ्चालनमा छन् ।
