खोटाङ, १२ मङ्सिर । सगरमाथा राष्ट्रिय राजमार्ग अन्तरगत दिक्तेल–गाईघाट सडकखण्डको फोक्सिङटारस्थित सुनकोशी नदीमा अस्थायी बेलिब्रिज जडान गर्नका लागि तयारी शुरु गरिएको छ । खोटाङको खोटेहाङ गाउँपालिका–९ लिच्कीराम्चे र उदयपुरको रौतामाई गाउँपालिका–५ आँपटार जोड्ने सुनकोशी नदीस्थित फोक्सिङटारको मोटरेबल पक्की पुल गत असोज १२ गते आएको भीषण बाढीले बगाएपछि अस्थायी बेलिब्रिज जडान गर्नका लागि तयारी शुरु गरिएको हो ।
खोटाङ र उदयपुरको सिमानामा पर्ने सुनकोशीस्थित फोक्सिङटारको मोटरेबल पक्की पुल भीषण बाढीका कारण बगेर क्षति भएपछि ५० मिटर लामो अस्थायी बेलिब्रिज जडान गर्नेगरी ठेक्का आव्हान गरिएको गाईघाट–दिक्तेल सडक कार्यालय उदयपुरले जनाएको छ । यही मङ्सिर–१८ गतेसम्म ठेकेदार कम्पनीले दरखास्त हाल्न पाउनेगरी समय दिएर सडक कार्यालयले प्रकाशन गरेको सूचनामा अस्थायी बेलिब्रिज जडान गरेर सञ्चालनमा ल्याउने र पुनः खोलेर राख्नेगरी ठेक्का आव्हान गरिएको हो ।
फोक्सिङटारमा वि.सं. २०७९ सालमा १२० मिटर लामो ‘आर्क’ डिजाइनको मोटरेबल पक्की पुल बनेपछि लामो समयअघिदेखि वर्षेनी अस्थायी बेलिब्रिज जडान गरेर यातायात सञ्चालन गर्ने र झिकेर राख्नुपर्ने बाध्यता अन्त्य भएको थियो । तर, दुई वर्ष नबित्दै बाढीले फोक्सिङटारको पुल बगाएपछि जिल्लावासीका लागि पुनः अस्थायी बेलिब्रिजको भर पर्नुपर्ने बाध्यता दोहोरिएको हो ।
पूर्वी तराईका विभिन्न जिल्ला जोड्ने सबैभन्दा छोटो मार्गमा पर्ने सुनकोशीस्थित फोक्सिङटारमा वि.सं. २०७९ सालमा खोलेर राखिएको बेलिब्रिजको सामानलाई नै पुनः राख्ने तयारी गरिएको जनाइएको छ । सो स्थानमा हिउँदमा राख्ने र वर्षा लाग्ने बित्तिकै झिक्नेगरि अस्थायी बेलिब्रिज जडान गरेर सञ्चालन गर्ने गरिएको थियो ।
निर्माण कम्पनी गौरी–पार्वती–वाईपी जेभीले फोक्सिङटारमा निर्माण गरिरहेको पुल ‘फिनिसिङ’ गर्न र हस्तान्तरण गर्न बाँकी छँदै वि.सं. २०७९ पुस–७ गतेदेखि सञ्चालनमा ल्याइएको थियो । ठेकेदारको ढिलासुस्तीका कारण फोक्सिङटारमा मोटरेबल पक्की पुल बन्न दश वर्ष कुर्नु परेको थियो ।
सडक कार्यालयले सूचना प्रकाशन गरेपछि संविधानसभा सदस्य विशाल भट्टराईले फोक्सिङटारमा आगामी पुस दोस्रो साताभित्र अस्थायी बेलिब्रिज जडान सम्पन्न गरेर सञ्चालनमा ल्याउनेगरी पहल भइरहेको सामाजिक सञ्जाल फेसबुकमा लेख्नुभएको छ । नेपाल कम्युनिष्ट पार्टी (एमाले)का पोलिटब्यूरो सदस्यसमेत रहनुभएका संविधानसभा सदस्य भट्टराईले वर्षाद्को समयमा समेत निकाल्नु नपर्नेगरी पुल निर्माणमा तदारुकताका साथ लागेको उल्लेख गर्नुभएको छ ।
प्रतिनिधिसभा सदस्य एवम् तत्कालीन १ नं. प्रदेश (हाल कोशी प्रदेश) सरकारका निवर्तमान उर्जा, जलस्रोत तथा खानेपानीमन्त्री रामकुमार राई ‘पासाङ’ले फोक्सिङटारमा स्थायी पुल निर्माणका लागि आफ्नो क्षेत्रबाट सशक्तरुपमा पहल गरिरहेको बताउनुभएको छ । “फोक्सिङटारमा तत्कालका लागि अस्थायी बेलिब्रिज जडान गर्न पटकपटक सम्बन्धित निकायमा खबरदारी ग¥यौँ । बल्ल सडक पूर्वाधार कार्यालयले ठेक्का आव्हान भएको सूचना प्रकाशन गरेको छ । सम्भवतः आगामी पुसभित्र अस्थायी बेलिब्रिज जडान भएर सञ्चालनमा आउँछ”, उहाँले भन्नुभयो, “फोक्सिङटारमा पुनः अर्को स्थायी पुल नबनेसम्म समस्या समाधान हुँदैन । खोटाङ्गे जनताको भविष्यसँग जोडिएको फोक्सिङटारमा स्थायी पुल निर्माण गर्न सशक्तरुपमा पहल भइरहेको छ ।”
कोशी प्रदेश सरकारका भौतिक पूर्वाधार विकास एवम् स्वास्थ्यमन्त्री भूपेन्द्र राईले फोक्सिङटार पुलको स्थायी समाधानका लागि आफूले प्रयास जारी रहेको फेसबुकमा लेख्नुभएको छ । कोशी प्रदेश सरकारकै सामाजिक विकासमन्त्री पाँचकर्ण राई ‘पिके’को सचिवालयले समेत फोक्सिङटारमा स्थायी पुल बनाउन पहल गरिरहेको सामाजिक सञ्जाल फेसबुकमा लेखेका छन् ।
फोक्सिङटारको मोटरेलब पक्की पुल बाढीले बगाएपछि पूर्वी तराईसँगको सिधा सम्पर्क बिच्छेद भएको वर्तमान अवस्थामा नेताहरुको खबरदारीले चाँडै अस्थायी बेलिब्रिज जडान भएर सञ्चालनमा आउने जिल्लावासीले विश्वास गरेका छन् । फोक्सिङटारको मोटरेबल पक्की पुल बाढीले बगाएपछि जिल्लाको भौतिक पूर्वाधार विकास अबको दश वर्ष पछाडि धकेलिएको जिल्लावासीले बताउँदै आएका छन् ।
देशभर जनधनको ठूलो क्षति गर्नेगरी आएको अविरल वर्षासँगै बाढीले फोक्सिङटार पुल बगाएपछि ठेकेदार कम्पनी तथा नेताहरुको चर्को आलोचना भइरहेको छ । नेताहरुले कमिशनको लोभमा निर्माण गर्नुअघि ठेकेदारसँगको मिलेमतोमा गलत डिजाइन गराएर कमसल किसिमको निर्माण सामग्री प्रयोग गरेर मोटरेबल पक्की पुल बनाएकाले बाढीले बगाएको उनीहरुको आरोप छ ।
दिक्तेल–गाईघाट सडकखण्डको महुरे–फोक्सिङटार (४९ किलोमिटर) सडक कालोपत्रको काम अलपत्र छ । जिल्लाको प्रमुख व्यापारिक केन्द्र दिक्तेल बजारबाट तराईका विभिन्न जिल्ला जोड्ने सबैभन्दा छोटो मार्गमा पर्ने उक्त सडकखण्ड कालोपत्रको काममा ठेकेदार कम्पनीको चरम लापरबाहीका कारण अलपत्र परेको हो ।
