काठमाडौँ। दुर्लभ वन्यजन्तु रातो हाब्रेको छाला ओसारपसार तथा बिक्रीवितरण मुद्दामा फरार एक व्यक्ति आज कारागार चलान भएका छन् । काठमाडौँ जिल्ला अदालतको गत फागुन १५ गतेको फैसलाले पाँच वर्ष कैद तोकिएका नुवाकोट शिवपुरी गाउँपालिका– २ का अशोक भनिने श्यार्पा तामाङ कारागार चलान भएका हुन् ।
प्रहरीको केन्द्रीय अनुसन्धान ब्युरोबाट खटिएको टोलीले सोमबार बेलुका काठमाडौँ सामाखुशीबाट उनलाई पक्राउ गरी काठमाडौँ जिल्ला अदालतमा पेश गरेकामा अदालतको आदेशले आजै कैद भुक्तानीका लागि कारागार चलान गरिएको हो ।
रातो हाब्रेको छाला ओसारपसार तथा बिक्रीवितरण हुँदैछ भन्ने सूचनाका आधारमा प्रहरीले गएको भदौमा काठमाडौँ तारकेश्वर नगरपालिका– १० मनमैजुबाट रातो हाब्रेको छालासहित उनलाई पक्राउ गरेको थियो । उक्त मुद्दामा अदालतबाट माग भएको धरौटीबापत जेथा जमानीमा तारेखमा रहेको तामाङ अदालतको फैसलापछि फरार रहेका थिए ।
रातो हाब्रेको छाला बिक्रीवितरणमा संलग्न सोही मुद्दाका अर्का व्यक्ति सन्तोषकुमार तामाङ यसअघि नै जेल चलान भइसकेको ब्युरोका प्रहरी उपरीक्षक उमाप्रसाद चतुर्वेदीले जानकारी दिए।
