दमक। राष्ट्रपति विद्यादेवी भण्डारीले कृषि क्षेत्रलाई रोजगारमुखी तथा व्यावसायिक उद्योगका रुपमा विकास गर्न देशको मुख्य चुनौती भएको औँल्याएकि छिन् ।
झापाको गौरादह नगरपालिका– ५ स्थित महारानीझोडा साना किसान कृषि सहकारी संस्थाद्वारा प्रवद्र्धित नमूना सहकारी खेती एवं साना किसान विकास अभियानका गतिविधिको अवलोकन कार्यक्रमलाई सम्बोधन गर्दै उहाँनले देशको ठूलो हिस्सा मानिएको कृषि क्षेत्र अझै निर्वाहमुखीमा सीमित रहनु चिन्ताजनक भएकाले कृषि क्षेत्रलाई आधुनिकीरण गरेर व्यावसायीकरण गर्न ध्यान दिनुपर्ने औँल्याइन् ।
गरीबी निवारणमा सहकारीलाई उपयोगी बनाउन सरकारले उच्च प्राथमिकता दिनुपर्नेमा उनले जोड दिइन् । सहकारी अभियान देशकै नमूना भएको बताउँदै उनले भनिन्, “सहकारीमार्फत मुलुकको समृद्धि यात्रालाई टेवा दिन सबै क्षेत्र जुट्नुपर्छ ।” उनले महारानीझोडा साना किसान कृषि सहकारी संस्थामा सङ्गठित महिलाको सहकारी अभियानका गतिविधि सबैका लागि उदाहरणीय भएको उनको भनाइ थियो ।
त्यस अवसरमा गौरादह नगरपालिकाका तर्फबाट राष्ट्रपति भण्डारीलाई नागरिक अभिनन्दन गरिएको थियो । नगर प्रमुख रोहितकुमार शाहले अभिनन्दनपत्र हस्तान्तरण गरेका थिए ।
सोही कार्यक्रममा प्रदेश नं १ का मुख्यमन्त्री शेरधन राईले कृषिलाई व्यावसायिक गरी औद्योगिकीकरण गरिए मात्र कृषिले आर्थिक रुपान्तरणमा फड्को मार्ने बताउँदै कृषि औद्योगिकीकरण गर्न प्रदेश सरकारले जोड दिएको बताउँदै जानकारी दिए ।
आन्तरिक मामिला तथा कानूनमन्त्री हिक्मत कार्कीले कृषिको रुपान्तरण र आधुनिकीकरणविना आर्थिक समृद्धि पूरा नहुने बताए । कार्यक्रममा संस्थाद्वारा प्रवद्र्धित हल्दिबारी साना किसान सहकारी संस्था र मोरङ साना किसान सहकारीद्वारा प्रवद्र्धनात्मक केरौन साना किसान सहकारी संस्थाको प्रमाणपत्रसमेत हस्तान्तरण गरिनाका साथै संस्थामा आबद्ध कृषि वैज्ञानिक रामशिष साहलाई सम्मान गरिएको संस्थाका अध्यक्ष मीना ढकालले बताइन् ।
