सप्तरी । प्रहरीले बलान बिहुल गाउँपालिका– ६ बाट आज तीन बोरा अवैध समान बरामद गरेको छ ।
प्रहरी चौकी मौवाहाबाट खटिएको प्रहरी टोलीले भारतबाट भन्सार छली चोरी पैठारी गरी ल्याइएको बिँडी एक बोरा, सुर्ती एक बोरा र राजनिवास एक बोरा बरामद गरेको जनाइएको छ । बेवारिसे अवस्थामा फेला परेका सामान बरामद गरी प्रहरीले तिलाठी कोइलाडीस्थित बेल्ही भन्सार कार्यालयमा बुझाएको छ ।
लागुऔषधसहित पक्राउ
बोदे बर्साइन बजारबाट प्रहरीले लागुऔषधसहित सिरहाका एक किशोरलाई आज पक्राउ गरेको छ । बोदे बर्साइन नगरपालिका–५ स्थित शत्रुघ्न चोकबाट लागुऔषधसहित सिरहाको लहान नगरपालिका–२३ बस्ने १८ वर्षीय भरत यादवलाई पक्राउ गरिएको जिल्ला प्रहरी कार्यालय सप्तरीले जनाएको छ ।
यादवको साथबाट नुर्फिन २९, फेनारगन ५१, डाइजेल्याप ५० र नाइट्रोभेट ६०० थान बरामद गरेको प्रहरी उपरीक्षक राजेन्द्र विष्टले बताउनुभयो । इलाका प्रहरी कार्यालय बोदे बर्साइनबाट खटिएको प्रहरी टोलीले जाँच गर्ने क्रममा भारतबाट नेपालतर्फ आउँदै गरेका यादवको साथबाट सो अवैध लागुऔषध बरामद गरेको जनाइएको छ ।
